ARSÉNAL INDONÉSIA SUPPORTER SUKABUMI NGALAKSANAKEUN DONOR DARAH

Reporter/Redaktur/Editor : ENDANG SUMARDI

Arsénal Indonésia Supporter Sukabumi, ngalaksanakeun gerakan donor darah di Markas PMI (Palang Mérah Indonésia) Kota Sukabumi, Jalan Ariéf Rahman Hakim Kota Sukabumi, anyar-anyar ieu. Hadir dina éta kasempetan, Wali Kota Sukabumi, H. Achmad Fahmi, Asistén Paékonomian jeung Pangwangunan Setda Kota Sukabumi, Ir. H. Cécép Mansur, M.M., katut Ketua PMI Kota Sukabumi, drh. H. Suranto Sumowiryo.

Wali Kota Sukabumi nandeskeun, pandemi Virus Corona atawa Covid-19, kacida mangaruhannana kana sagala rupa hal, kaasup kasadiaan darah di PMI, sarta éta hal téh jadi masalah pikeun sakumna pihak.

Ku sabab kitu, Wali Kota ngahaturkeun nuhun katut pangajén anu saluhur-luhurna ka Arsénal Indonésia Supporter Sukabumi, anu geus ngalaksanakeun gerakan donor darah di Markas PMI Kota Sukabumi.

Salian ti éta, Wali Kota ogé ngajelaskeun, nurutkeun béwara anu katarima, kagiatan donor darah anu dilaksanakeun ku Arsénal Indonésia Supporter téh, dicalagarakeun bareng di 57 kota jeung kabupatén sa Indonésia.

Wali Kota ngaharepkeun, kagiatan bhakti sosial donor darah anu dilaksanakeun ku Arsénal Indonésia Supporter téh, bisa jadi inspirasi jeung motivasi pikeun nu séjénna, dina ngalaksanakeun bhakti sosial donor darah.

Ku sabab kitu, Wali Kota cumeluk sakaligus meredih ka sakumna pihak, sangkan ngalaksanakeun bhakti sosial donor darah sakumaha biasana, sarta ulah ngarasa sieun ngadonorkeun darah dina mangsa pandemi Covid-19, lantaran dina mangsa ngadonorkeun darah téh diterapkeun standar kaséhatan maksimal.

Leave a Reply