PAMARÉNTAH KOTA SUKABUMI MEUNANG BANTUAN DEUI TI 8 DONATUR

Reporter/Redaktur/Editor : ENDANG SUMARDI

Pamaréntah Kota Sukabumi, meunang deui bantuan ti 8 donatur, pikeun ngungkulan jeung nyegah panyebaran Covid-19. Nya éta suplemén 470 pakét jeung 7 dus hand sanitizer anu eusina 270 botol ti PII (Pasatuan Insinyur Indonésia), 30 Kacamata Googlé ti Varia Éléktronik, 10 box Sarung Tangan Karét ukuran S ti Toko Hongkiat, sarta 30 box Sarung Tangan Karét ukuran M jeung L ti PT Wyn Karya Perkasa. Salajuna 300 léter Biang Cairan Disinféktan ti PT Rismawan Pratama Bersinar, 10 rébu endog hayam ti CV Intan Jaya Abadi, 2 Wastafel Portable jeung sarébu masker ti BPJS Katanagakerjaan, sarta 2 rébu 160 Masker Kaén ti PT Indomaret.

Éta bantuan téh ditarima ku Wali Kota Sukabumi, H. Achmad Fahmi, katut Wakil Wali Kota Sukabumi, H. Andri S. Hamami, S.H., M.H., di Rohangan Utama Balé Kota Sukabumi, anyar-anyar ieu. Hadir dina éta kasempetan, Kapala Disnaker (Dines Tanaga Kerja) Kota Sukabumi, Drs. H. Didin Syarifudin, M.Si., sarta Kapala Bagian Paékonomian, Pangwangunan jeung Kerja Sama Daérah Setda Kota Sukabumi, Rahmat Sukandar, S.Si., M.T., M.Sc.

Wali Kota kalayan asmana Pamaréntah Kota Sukabumi, ngahaturkeun nuhun ka sakumna pihak, kana sagala rupa pangrojong jeung ilubiungna dina megatkeun mata ranté Covid-19 di Kota Sukabumi. Saterusna ngajelaskeun, dina mangsa pandemi Covid-19, salian kaséhatan aya 2 widang séjénna anu ngabutuhkeun pangrojong jeung bantuan sarta kontribusi ti sakumna pihak jeung sakumna élemén masarakat, nya éta jaringan pangaman sosial jeung ékonomi ngahirupkeun UMKM.

Disagigireun ti éta ogé ngajelaskeun, dina mangsa pandemi Covid-19, aya tanaga médis anu keuna ku Covid-19. Ku sabab kitu, sala sahiji cara pikeun ngahudangkeun sumangat para tanaga médis, nya éta ngajamin para tanaga médis ku APD (Alat Palindung Diri). Salian ti éta, ogé daya tahan tubuh tanaga médis kudu kuat, sala sahijina ku cara meunang gizi anu hadé. Salajuna ngajelaskeun, ieu bantuan téh sabagé bentuk kolaborasi jeung gawé bareng, dina ngungkulan jeung nyegah panyebaran Covid-19. Wali Kota ngaharepkeun, ieu masalah téh bisa sagancangna diungkulan jeung diréngsékeun.

Leave a Reply