PAMARÉNTAH KOTA SUKABUMI MEUNANG BANTUAN TI PDHI CABANG VI JAWA BARAT

Reporter/Redaktur/Editor : ENDANG SUMARDI

Pamaréntah Kota Sukabumi meunang deui bantuan pikeun ngungkulan Covid-19, nya éta ti PDHI (Perhimpunan Dokter Héwan Indonésia) Cabang VI Jawa Barat, mangrupa sarébu masker sarta 150 léter biang disinféktan jeung alat spray. Ěta bantuan téh ditarima ku Wali Kota Sukabumi, H. Achmad Fahmi, dibarengan ku Sekertaris Daérah Kota Sukabumi, Drs. H. Dida Sembada, M.M., Asistén Paékonomian jeung Pangwangunan Setda Kota Sukabumi, Ir. H. Cécép Mansur, M.M., sarta PLT (Palaksana Tugas) Kapala Dinés Kaséhatan Kota Sukabumi, dr. Hj. Rita Fitrianingsih, M.Kes., di Rohangan Utama Balé Kota Sukabumi, sawatara poé ka tukang, pikeun disalurkeun ka para tanaga médis di rumah sakit.

Wali Kota Sukabumi ngajelaskeun, ieu bantuan téh kacida pentingna dina upaya panghangkeutan panyegahan Covid-19 di Kota Sukabumi. Ku sabab kitu, Wali Kota kalayan asmana Pamaréntah Kota Sukabumi, ngahaturkeun nuhun kana bantuan ti PDHI Cabang VI Jawa Barat, boh anu geus boh nu arék dipasrahkeun. Saterusna ngajelaskeun, sok sanajan sakumaha leutikna bantuan jeung kontribusi anu dipasrahkeun, baris aya hartina jeung gedé mangpaatna dina upaya ngungkulan jeung nyegah panyebaran Covid-19. Lian ti éta ogé ngajelaskeun, pangrojong ti organisasi profési ieu, bisa nahan jeung nyegah panyebaran Covid-19.

Sedengkeun Ketua PDHI Cabang VI Jawa Barat, drh. Riki Barata ngajelaskeun, ieu bantuan téh sabagé bentuk pahatian jeung kapadulian ti PDHI dina ngungkulan Covid-19. Salian ti ka Pamaréntah Kota Sukabumi, bantuan anu sarua ogé dipasrahkeun ka Pamaréntah Kabupatén Sukabumi jeung ka Pamaréntah Kabupatén Cianjur. Ketua PDHI Cabang VI Jawa Barat ngaharepkeun, ku éta bantuan téh bisa ngarojong kana usaha ngungkulan jeung nyegah panyebaran Covid-19.

Leave a Reply