PAMARÉNTAH KOTA SUKABUMI GEUS NGABENTUK TIM GUGUS TUGAS PANANGANAN COVID-19

Reporter : ARIF HIDAYAT

Redaktur/Editor : ENDANG SUMARDI

Pamaréntah Kota Sukabumi geus ngabentuk Tim Gugus Tugas Pananganan Covid-19, ti mimiti tingkat kota, kacamatan jeung kalurahan nepi ka tingkat RW. Maksud jeung tujuannana, sabagé sala sahiji usaha pikeun ngahangkeutkeun dina ngungkulan jeung nyegah panyebaran Virus Corona atawa Covid-19 di Kota Sukabumi. Sakumaha anu dijelaskeun ku Camat Warudoyong, Ratna Hérmayanti, S.STP., M.AP., yén ieu Tim Gugus Tugas téh hususna di kacamatan ngalibetkeun sakumna unsur, nya éta Kacamatan, Muspika, Kalurahan, sarta Ketua RW jeung RT.

Anapon ngeunaan mékanismeu pandataan jalma-jalma anu gampang keuna ku panyakit, numutkeun Camat Warudoyong, yén Tim Gugus Tugas ngaliwatan Ketua RT jeung RW ngalaksanakeun pandataan, diantarana ka masarakat anu datang boh ti wewengkon anu geus asup zona mérah boh ti wewengkon anu teu asup zona mérah.

Ěta data téh dilaporkeun ka Kalurahan, Puskesmas jeung Kacamatan masing-masing. Saterusna éta data téh dilaporkeun ka Dines Kaséhatan Kota Sukabumi. Saupama diperlukeun pananganan langsung, Dines Kaséhatan baris nurunkeun tim pikeun ngalaksanakeun pamariksaan.

Camat Warudoyong ogé ngajelaskeun, rupa-rupa tarékah jeung upaya geus dilaksanakeun sarta baris terus dilaksanakeun ku pihak kacamatan, dina ngungkulan jeung nyegah panyebaran Covid-19, diantarana ku ngaronjatkeun PHBS (Prilaku Hirup Bersih jeung Séhat), sala sahijina ku remen ngumbah leungeun maké sabun di cai anu ngocor jeung panyemprotan ku disinféktan. Lian ti éta, di satiap RW di wewengkon Kacamatan Warudoyong, geus dipasang fasilitas wastafel portabel jeung keran cai, pikeun masarakat ngumbah leungeun. Ěta fasilitas téh dipasang ku masing-masing masarakat di satiap RW.

Leave a Reply