NEPI KA DANGET IEU GEUS AYA 47 PIHAK ANU GEUS NYALURKEUN BANTUAN

Reporter : RIKSAN SATYAPRAWIRA

Redaktur/Editor : ENDANG SUMARDI

Nurutkeun data ti Bagian Paékonomian, Pangwangunan jeung Kerjasama Daérah Setda Kota Sukabumi, nepi ka danget ieu cindekna nepi ka tanggal 21 April 2020, geus aya 47 pihak anu geus nyalurkeun bantuan ngaliwatan Pamaréntah Kota Sukabumi, pikeun ngungkulan Covid-19 di Kota Sukabumi. Ka 47 pihak anu geus nyalurkeun bantuan téh, ngawengku ti BUMN, Pausahaan, Organisasi jeung Komunitas, kaasup ti individu atawa pasaurangan masarakat.

Anapon éta bantuan téh ngawengku ti 35 wastafel portabel, 1.970 APD (Alat Palindung Diri), 6.900 masker, 210 face shield, 50 rompi, sarta 500 botol biang disinféktan. Salajuna sa-boks disinféktan, 90 hand sanitizer, 16.000 endog hayam, 2.000 pakét Sembako jeung 1.500 boks sangu. Salian ti éta, ogé geus ngumpul dana Rp. 9 juta.

Ěta rupa-rupa bantuan téh sabagian geus disalurkeun, diantarana ka para tanaga kaséhatan boh di rumah sakit boh di Puskemas sa Kota Sukabumi, kaasup ka masarakat saperti wastafel portabel anu dipasang di sajumlah tempat, diantarana di Jalan Perintis Kemerdekaan jeung Jalan Ahmad Yani, sarta masker ka para padagang di pasar jeung ka masarakat.

Wali Kota Sukabumi, H. Achmad Fahmi, dina satiap kasempetan ngajelaskeun, yén dina usaha ngungkulan jeung nyegah panyebaran Covid-19 téh, dibutuhkeun gawé bareng jeung sakumna pihak. Lian ti éta, Wali Kota ogé ngahaturkeun nuhun katut pangajén anu saluhur-luhurna ka sakumna pihak, anu geus ilubiung ngarojong jeung méré rupa-rupa bantuan, pikeun ngungkulan jeung nyegah panyebaran Covid-19 di Kota Sukabumi.

Leave a Reply