WALI KOTA SUKABUMI NYUMPAH JEUNG NGISTRÉNAN 103 URANG CPNS JADI PNS

Reporter : ARIF HIDAYAT

Redaktur/Editor : ENDANG SUMARDI

Wali Kota Sukabumi, H. Achmad Fahmi, nyumpah jeung ngistrénan 103 urang CPNS (Calon Pagawé Negri Sipil) jadi PNS (Pagawé Negri Sipil) di lingkungan Pamaréntah Kota Sukabumi, cindekna tanggal 28 April 2020, ngaliwatan téknologi vidéo conferénce, di Rohangan Utama  Balé Kota Sukabumi, sarta ngan ukur aya 5 urang CPNS anu hadir, maké masker jeung ngajaga jarak fisik atawa physical distancing.

Anapon ka 103 urang éta CPNS téh ngawengku ti tanaga kaséhatan 46 urang, tanaga pangatik 37 urang jeung tanaga téknis 10 urang, sarta PNS anu asalna ti IPDN 6 urang jeung ti STTD 4 urang.

Hadir dina kasempetan éta, Wakil Wali Kota Sukabumi, H. Andri S. Hamami, S.H., M.H., Sekertaris Daérah Kota Sukabumi, Drs. H. Dida Sembada, M.M., katut para pajabat nu aya kaitannana.

Dina biantarana Wali Kota Sukabumi ngajelaskeun, palaksanaan nyumpah jeung ngistrénan PNS danget ieu, aya nu hadir langsung sacara fisik jeung aya nu virtual di sajumlah titik ngaliwatan vidéo conferénce.

Ku sabab kitu, Wali Kota Sukabumi neda dihampura, lantaran prosési panyumpahan jeung pangistrénan PNS téh, danget ieu béda jeung waktu-waktu saméméhna.

Anu jadi panyababna, nya éta pandemi Virus Corona atawa Covid-19. Anu pamustungannana, prosési panyumpahan jeung pangistrénan ieu PNS téh aya anu dilaksanakeun sacara virtual di sababaraha tempat, sarta ieu hal téh ngarupakeun anu munggaran dina sajarah panyumpahan jeung pangistrénan PNS.

Saterusna Wali Kota Sukabumi nandeskeun, aya 3 dasar ajén anu kudu dipibanda ku satiap PNS atawa ASN (Aparatur Sipil Nagara), diantarana ajén dasar integritas. Maksud jeung tujuannana, sangkan  satiap PNS téh ngabogaan sikep ngalayanan lain dilayanan jeung ngajungjung luhur profésionalismeu, sarta ditengah pandemi Covid-19 danget ieu, kudu aya di garda panghareupna jeung méré bantuan ka masarakat.

Leave a Reply