PAMARÉNTAH KOTA SUKABUMI GEUS NERAPKEUN PSBB

Reporter/Redaktur/Editor : ENDANG SUMARDI

Pamaréntah Kota Sukabumi geus nerapkeun PSBB (Pembatasan Sosial Berskala Besar), cindekna ti tanggal 6 Méi 2020, pukul 00.00 WIB. Diterapkeunnana éta PSBB téh dina raraga usaha ngungkulan jeung cegah panyebaran Corona Virus Diséase atawa Covid-19 di Wewengkon Kota Sukabumi, sarta dumasar kana Paraturan Gubernur Jawa Barat Nomer 36 Taun 2020, ngeunaan PSBB dina Ngungkulan Covid-19 di Tatar Provinsi Jawa Barat, katut Perwal (Peraturan Wali Kota) Sukabumi Nomer 20 Taun 2020, ngeunaan Pedoman PSBB dina Ngungkulan Covid-19 di Wewengkon Kota Sukabumi.

Dina éta Perwal téh disebutkeun, salila diterapkeunnana PSBB, satiap jalma wajib ngumbah leungeun maké sabun dina cai anu ngocor katut nerapkeun PHBS (Prilaku Hirup Bersih jeung Sehat), sarta maké masker saupama ka luar ti imah. Salajuna diajar, ibadah jeung digawé di imah atawa di padumukan masing-masing, kecuali séktor pertahanan jeung kaamanan, katartiban umum, pangan, bahan bakar minyak jeung gas, kaséhatan, paékonomian jeung kauangan, sarta komunikasi, industry, ékspor jeung impor, distribusi, logistik jeung kabutuhan dasar lianna.

Saterusna ngawatesanan jam oprasional toko busana, toko bahan bangunan, béngkél, toko sparépart kandaraan, luyu jeung Surat Édaran ti Diskop UKM-PP (Dines Koprasi, Usaha Kecil Menengah, Padagangan jeung Paindustrian) Kota Sukabumi, nya éta ti pukul 9 isuk nepi ka pukul 4 soré. Salajuna Warung, Supermarkét atawa Toko Modéren anu ngajual Bapokting (Bahan Pokok Penting), ti pukul 9 isuk nepi ka pukul 8 peuting.

Sedengkeun pikeun Réstoran, Rumah Makan atawa Tempat Makan jeung sajenisna, teu meunang méré palayanan dahar di tempat, tapi ukur méré palayanan pikeun dibawa balik atawa také away jeung palayanan nganteurkeun ti pukul 9 isuk nepi ka pukul 8 peuting. Salian ti éta, perkantoran jeung industri nepi ka pukul 3 soré, sarta kudu nerapkeun aturan physical distancing atawa ngajaga jarak jeung SOP (Standar Oprasional Prosedur) Protokol Kaséhatan, saperti maké masker jeung hand sanitizer. Saterusna pikeun PKL (Padagang Kaki Lima), anu dagangna saméméh pukul 9 isuk, ngan ukur bisa méré palayanan pikeun dibawa balik atawa dibungkus, sarta husus pikeun Apoték jeung Rumah Sakit, jam oprasionalna ngacu kana katangtuan anu ditetepkeun.

Sakumaha anu dijelaskeun ku PLT (Palaksana Tugas) Kapala Diskop UKM-PP Kota Sukabumi, Drs. H. Didin Syarifudin, M.Si., éta Surat Édaran téh diterapkeun ti tanggal diterbitkeunnana, nya éta tanggal 6 Méi 2020, sarta baris diévaluasi dina jangka waktu 14 poé, ku cara niténan kamekaran panerapan PSBB di Kota Sukabumi.

Leave a Reply