LKPJ WALI KOTA KATUT WAKIL WALI KOTA SUKABUMI TAUN 2019

Reporter/Redaktur/Editor : ENDANG SUMARDI

Wali Kota Sukabumi, H. Achmad Fahmi, masrahkeun LKPJ (Laporan Keterangan Pertanggung Jawaban) Wali Kota katut Wakil Wali Kota Sukabumi Taun 2019, ka DPRD Kota Sukabumi, dina Rapat Paripurna DPRD anu dipingpin ku Ketua DPRD Kota Sukabumi, H. Kamal Suhérman, S.H., anyar-anyar ieu, di Rohangan Rapat Paripurna DPRD Kota Sukabumi. Hadir dina kasempetan éta, Wakil Wali Kota Sukabumi, H. Andri S. Hamami, S.H., M.H., katut Sekertaris Daérah Kota Sukabumi, Drs. H. Dida Sembada, M.M.

Dina éta Rapat Paripurna téh, diterapkeun physical distancing atawa ngajaga jarak jeung maké masker, lantaran dilaksanakeun di tengah-tengah Pandemi Virus Corona atawa Covid-19. Maksud jeung tujuannana, sabagé sala sahiji upaya pikeun nyegah jeung megatkeun mata ranté panyebaran Covid-19.

Dina kasempetan éta, Wali Kota Sukabumi ngahaturkeun nuhun katut pangajén anu saluhur-luhurna ka Pingpinan katut Anggota DPRD Kota Sukabumi, anu geus ngalaksanakeun kawajiban konstitusional. Saterusna ngajelaskeun, LKPJ Wali Kota katut Wakil Wali Kota Taun Anggaran 2019, sacara téknis ngacu kana PP (Paraturan Pamaréntah) Nomer 13 Taun 2019, ngeunaan Laporan jeung Évaluasi Panyalagaraan Pamaréntah Daérah, sarta dina Pasal 19 ayat 1 disebutkeun, LKPJ Ahir Taun Anggaran paling lambat dipasrahkeun sanggeus 3 bulan taun anggaran réngsé. Ngan dumasar kana Surat Mendagri (Mentri Dalem Negri) tanggal 24 Maret 2020, pamasrahan LKPJ téh waktuna dipanjangan nepi tanggal 30 April 2020, alatan Bencana Pandemi Covid-19.

Anapon format LKPJ, ngawengku ti Pandahuluan, Panjabaran APBD (Anggaran Pandapatan jeung Balanja Daérah), Hasil Panyalagaraan Urusan Pamaréntahan, Capéyan Kinerja Palaksanaan Tugas Pangbantuan jeung Panugasan sarta Panutup. Lian ti éta ogé ngajelaskeun, pikeun nyumponan kana éta katangtuan téh, geus dipasrahkeun Buku LKPJ ka DPRD, cindekna tanggal 30 April 2020.

Sedengkeun maksud jeung tujuan dipasrahkeunnana LKPJ téh, sabagé sala sahiji bentuk pertanggungjawaban, dina ngemban amanah pamaréntahan jeung palaksanaan pangwangunan, sarta pangbinaan kahirupan kamasarakatan dina sagala widang dina taun 2019.

Leave a Reply