ZAKAT FITRAH JEUNG INFAQ ROMADHON DI KOTA SUKABUMI GEDÉNA 32 RÉBU RUPIA SAJIWA

Reporter/Redaktur/Editor : ENDANG SUMARDI

Sakumaha anu dijelaskeun ku Ketua Baznas (Badan Amil Zakat Nasional) Kota Sukabumi, Ir. H. Fifi Kusumajaya, M.M., Zakat Fitrah Taun 1441 Hijriyah, di Kota Sukabumi gedéna Rp. 30 rébu atawa ku béas 2,5 kilogram, ditambah Infaq Romadhon Rp. 2 rébu sajiwa, anu totalna jadi Rp. 32 rébu rupia sajiwa. Anapon Juknis (Patunjuk Téknis) Panyaluran Zakat Fitrah di Kota Sukabumi Taun 1441 Hijriyah atawa Taun 2020 Maséhi, didasarkeun kana Permenag (Peraturan Mentri Agama) Nomer 52 Taun 2014, nya éta ku béas 2,5 kilogram atawa 3,5 léter.

Sedengkeun hasil Zakat Fitrah Taun 1441 Hijriyah, baris disalurkeun ka mustahik, fakir, miskin, fisabillilah, ibnu sabil jeung ghorimin gedéna 62,5 peresén atawa 5 per 8 bagian nya éta 1,5 kilogram. Salajuna ka Amilin atawa Pangumpul Zakat 12.5 peresén atawa 1 per 3 bagian nya éta 0,313 kilogram, anu ngawengku ti Amilin RW 7,5 peresén atawa 0,1875 kilogram, Amilin Kalurahan 3 peresén atawa 0,075 kilogram, jeung Amilin Kacamatan 2 peresén atawa 0,050 kilogram, sarta disetorkeun ka Baznas gedéna 25 peresén atawa 2 per 8 bagian nya éta 0,625 kilogram, pikeun mustahik, mualaf jeung riqob.

Saterusna ngajelaskeun, saupama ku duit,  Zakat Fitrahna Rp. 30 rébu, sarta hasilna baris disalurkeun ka mustahik, fakir, miskin, fisabillilah, ibnu sabil jeung ghorimin gedéna 62,5 peresén atawa Rp. 18.750,00, ka Amilin 12,5 peresén atawa Rp. 3.750,00, anu ngawengku ti Amilin RW Rp. 2 rébu, Amilin Kalurahan Rp. 1 rébu, jeung Amilin Kacamatan Rp. 750,00, satuluyna disetorkeun ka Baznas 25 peresén atawa Rp. 7.500,00, pikeun mustahik, mualaf jeung riqob.

Sedengkeun Zakat Fitrah ngaliwatan SKPD (Satuan Kerja Perangkat Daérah) atawa Dines jeung Lembaga Rp. 30 rébu, nya éta pikeun Amilin SKPD atawa Dines jeung Lembaga 10 peresén atawa Rp. 3 rébu, jeung disetorkeun ka Baznas 90 peresén atawa Rp. 27 rébu, sarta baris dibagikeun ku Baznas. Saterusna husus pikeun Infaq Romadhon anu gedéna Rp. 2 rébu, disetorkeun langsung ka Baznas 100 peresén.

Satuluyna ngajelaskeun, hasil pangumpulan zakat di Kota Sukabumi, salian disalurkeun ka mustahik, fakir, miskin, fisabillilah, ibnu sabil jeung ghorimin, ogé pikeun Program Sukabumi Paduli bantuan ngoméan Rutilahu (Rumah Tidak Layak Huni) masarakat, Program Sukabumi Sajahtra bantuan modal usaha ka masarakat, Program Sukabumi Séhat bantuan kaséhatan masarakat, Program Sukabumi Cerdas bantuan ka anak sakola, jeung Program Sukabumi Taqwa bantuan ka guru ngaji.

Leave a Reply