DATA COVID-19 ANYAR NUNJUKKEUN ANU CAGEUR NGARONJAT LEUWIH TI 60 PERESÉN

Data Covid-19 anyar anu dirilis ku Gugus Tugas Percepatan Penanggulangan Covid-19 Kota Sukabumi, nunjukkeun anu cageur ngaronjat leuwih ti 60 peresén. Dumasar kana éta data anu dirilis poé Kemis, 28 Méi 2020, anyar-anyar ieu, aya 10 urang pasén positif dinyatakeun cageur. Anu pamustungannana, total pasén anu cageur téh ngahontal 38 urang. Sedengkeun pasén positif Covid-19 anu masih kénéh dirawat tinggal 23 urang deui. Ěta data anyar Covid-19 téh, nunjukkeun salila 6 poé pamungkas, cindekna ti tanggal 23 Méi 2020, taya panambahan pasén positif anyar di Kota Sukabumi.

Nurutkeun Juru Bicara Média Cénter Gugus Tugas Percepatan Penanggulangan Covid-19 Kota Sukabumi, dr. Wahyu Handriana, tina jumlah 10 urang anu cageur téh, ngawengku ti 8 urang déwasa jeung 2 budak, anu asalna ti Kalurahan Bénténg, Kalurahan Karamat, Kalurahan Karang Tengah, Kalurahan Subang Jaya, Kalurahan Babakan jeung Kalurahan Cikolé.

Anapon PDP (Pasén Dalam Pengawasan), jumlahna aya 41 urang, nya éta 3 urang masih dina jero pangawasan,  sarta 38 urang geus réngsé pangawasan. Salajuna jumlah ODP (Orang Dalam Pemantauan), jumlahna ngahontal 273 urang, nya éta 265 urang geus réngsé pamantauan, jeung 8 urang masih dina jero pamantauan.

Leave a Reply