PMI NGALAKSANAKEUN PANYEMPROTAN DISINFÉKTAN DI WEWENGKON KOTA SUKABUMI

Pikeun nyegah panyebaran Virus Covid-19 di Kota Sukabumi, PMI (Palang Mérah Indonésia) Kota Sukabumi gawé bareng jeung PMI Provinsi Jawa Barat, ngalaksanakeun panyemprotan disinféktan di wewengkon Kota Sukabumi,  anyar-anyar ieu.

Wali Kota Sukabumi, H. Achmad Fahmi, basa ngalepas éta kagiatan ngahaturkeun nuhun ka PMI Provinsi Jawa Barat jeung PMI Kota Sukabumi, anu ngalaksanakeun panyemprotan disinféktan di wewengkon Kota Sukabumi, sabagé wujud gawé bareng dina ngungkulan Covid-19. Wali Kota ngajelaskeun, yén dina ngungkulan Covid-19 téh, kudu ngalibetkeun sakujmna pihak.

Sedengkeun Ketua PMI kota Sukabumi, drh. Suranto Sumowiryo, ngajelaskeun PMI Kota Sukabumi usaha satékah polah ngabantu pamaréntah dina ngungkulan jeung nyegah sarta megatkeun mata ranté panyebaran Covid-19 di Kota Sukabumi. Lian ti éta ogé ngajelaskeun, palaksanaan panyemprotan danget ieu ngagunakeun kandaraan taktis gunner spraying blower milik PMI Provinsi Jawa Barat.

Dina éta kasempetan, dipasrahkeun bantuan ti PMI pikeun ngungkulan Covid-19, nya éta 10 unit wastafel portabel, 300 pakét PHBS atawa Covid Kit, 25 sét APD, sarta 2 rébu masker kaén, hasil produksi para rélawan anu ngagabung dina Sibat (Siaga Bencana Berbasis Masarakat), binaan PMI.

Leave a Reply