DISKOP UKM-PP KATUT TP PKK NYALAGARAKEUN PASAR MURAH RAMADHAN 1438 H DI 7 KACAMATAN SA KOTA SUKABUMI

Reporter : ENDANG SUMARDI

Diskop UKM-PP (Dines Koperasi, Usaha Kecil Menengah, Perdagangan jeung Perindustrian) Kota Sukabumi katut TP PKK Kota Sukabumi, nyalagarakeun Pasar Murah jeung Bazaar Ramadhan Taun 1438 H, di 7 Kacamatan sa Kota Sukabumi. Ěta kagiatan anu lumangsung salila 14 poé,  cindekna ti tanggal 30 Méi 2017 nepi ka tanggal 12 Juni 2017 ieu téh, dibuka sacara resmi ku Walikota Sukabumi, H. Mohamad Muraz, S.H., M.M., cindekna tanggal 30 Mei 2017, di Buruan Kantor Kalurahan Cisarua, Kacamatan Cikolé, Kota Sukabumi.

Hadir dina kasempetan éta, Wakil Walikota Sukabumi, H. Achmad Fahmi, S.Ag., M.M.Pd., Ketua DPRD Kota Sukabumi, Yunus Suhandi, S.IP., Wakil Ketua II DPRD Kota Sukabumi, H. Kamal Suhérman, S.H., Ketua TP PKK Kota Sukabumi, Hj. Ěsih Setiasih Muraz, S.Ě., Kapala Diskop UKM-PP Kota Sukabumi, Drs. Ayép Supriatna, M.M., Camat Cikolé, H. Ayi Jami’at, S.STP., M.Si., Lurah Cisarua, Wawan Ruswanda, S.Ag., sarta para tamu ondangan séjénna.

Kapala Diskop UKM-PP Kota Sukabumi, Drs. Ayép Supriatna, M.M. ngajelaskeun, Pasar Murah jeung Bazaar Ramadhan ieu téh, dilaksanakeun sacara rutin satiap taun, di satiap Kacamatan sa Kota Sukabumi, cindekna dina satiap Bulan Ramadhan. Anapon maksud jeung tujuannana, nya éta sabagé sala sahiji usaha ngawujudkeun kahayang warga masarakat Kota Sukabumi, sangkan di satiap Kacamatan sa Kota Sukabumi, dilaksanakeun Pasar Murah jeung Bazaar Ramadhan, pikeun ngabantu sakaligus ngénténgkeun kabeurat warga masarakat, hususna warga masarakat anu kurang mampuh.

Salajuna dijelaskeun, Pasar Murah jeung Bazaar Ramadhan ieu téh, dilaksanakeun di satiap Kacamatan sa Kota Sukabumi, masing-masing salila 2 poé. Nya éta di Kacamatan Cikolé tanggal 30 jeung 31 Méi 2017, di Buruan Kantor Kalurahan Cisarua, Kacamatan Cibeureum tanggal 1 jeung 2 Juni 2017, di Buruan Kantor Kacamatan Cibeureum, sarta Kacamatan Citamiang tanggal 3 jeung 4 Juni 2017, di Buruan Kantor Kacamatan Citamiang.

Saterusna Kacamatan Baros tanggal 5 jeung 6 Juni 2017, di Buruan Kantor Kalurahan Jayaraksa, Kacamatan Lembursitu tanggal 7 jeung 8 Juni 2017, di Buruan Kantor Kacamatan Lembursitu, Kacamatan Warudoyong tanggal 9 jeung 10 Juni 2017, di Buruan Kantor Kacamatan Warudoyong, sarta Kacamatan Gunung Puyuh tanggal 11 jeung 12 Juni 2017, di Buruan Kantor Kalurahan Gunung Puyuh.

Sedengkeun barang-barang anu dijual di Pasar Murah jeung Bazaar Ramadhan téh, nya éta pikeun satiap pakétna hargana Rp. 68.000,00, anu ngawengku ti 3 kilogram Béas anu hargana Rp. 22.500,00, sakilogram Gula Pasir hargana Rp. 10.000,00, sakilogram Tipung Tarigu hargana Rp. 6.000,00, sakilogram Suuk hargana Rp. 19.000,00, jeung saléter Minyak Goreng dina kemasan hargana Rp. 11.000,00. Salain ti éta, ogé ngajual rupa-rupa jenis inuman jeung kadaharan siap saji, kadaharan garing, endog asin, busana muslim, jeung barang-barang penting séjénna.

Kapala Diskop UKM-PP Kota Sukabumi nandeskeun, harga barang-barang anu dijual di Pasar Murah jeung Bazaar Ramadhan ieu téh kawilang murah, sabab anu balanjana meunang potongan harga atawa diskon anu gedéna 30 peresén tina harga pasar. Tah kulantaran kitu, dina panyalagaraan Pasar Murah jeung Bazaar Ramadhan ieu téh, pihak Diskop UKM-PP Kota Sukabumi méré subsidi anu gedéna Rp. 163.000.000,00, pikeun sakumna jenis barang anu dijual.