PANGWANGUNAN PASAR PELITA KOTA SUKABUMI DIHAREPKEUN BISA DIMIMITIAN SATUTAS IDUL FIRI 1438 H

Reporter : ENDANG SUMARDI

Pangwangunan Pasar Pelita Kota Sukabumi, diharepkeun bisa dimimitian satutas Idul Firi 1438 H. Tah kulantaran kitu, Walikota Sukabumi, H. Mohamad Muraz, S.H., M.M., ménta doana ka sakumna lapisan warga masarakat Kota Sukabumi hususna ka para padagang, sangkan Pangwangunan Pasar Pelita Kota Sukabumi téh, bisa dimimitian satutas Idul Firi 1438 H.

Tah pikeun ngawujudkeun éta harepan téh, pihak Pamaréntah Kota Sukabumi geus ngondang pihak PT FAP (Fortunindo Artha Perkasa), nya éta anu meunang lélang Pangwangunan jeung Pangalolaan Pasar Pelita Kota Sukabumi, pikeun sagancangna ngalaksanakeun sosialisasi ka para padagang anu rék meuli kios Pasar Pelita Kota Sukabumi anu anyar. Lantaran para padagang anu rék meuli kios di éta pasar téh, kudu apal kana tata cara meuli kios ku cara nyicil.

Sedengkeun Ketua DPRD Kota Sukabumi, Yunus Suhandi, S.IP. nandeskeun, sakumna Pingpinan katut Anggota DPRD Kota Sukabumi, baris salawasna ngarojong kana usaha jeung tarékah pikeun ngagancangkeun prosés pangwangunan Pasar Pelita Kota Sukabumi, luyu jeung rarancang katut kawijakan Pamaréntah Kota Sukabumi, nya éta pikeun kapentingan jeung nyumponan kabutuhan warga masarakat jeung para padagang.

Saterusna ditandeskeun, DPRD Kota Sukabumi moal nyulitkeun jeung ngarumitkeun kana prosés jeung panyalagaraan pajangjian gawé bareng antara Pamaréntah Kota Sukabumi jeung PT FAP, sabab geus saluyu jeung Permendagri (Peraturan Mentri Dalem Nagri) RI Nomer 19 Taun 2016, Ngeunaan Padoman Pangalolaan Barang Milik Daérah.

Lian ti éta ogé ditandeskeun, tugas jeung fungsi  DPRD mah ngan saukur sabagé controling atawa nalingakeun, sarta ménta katerangan jeung pananggungjawaban ka Pamaréntah. Sedengkeun ngeunaan usaha pikeun ngagancangkeun prosés pangwangunan Pasar Pelita Kota Sukabumi mah, ngarupakeun tugas jeung fungsi sarta kawijakan Pamaréntah Kota Sukabumi.

Disagigireun ti éta, Ketua DPRD Kota Sukabumi miharep sakaligus ngadesek ka pihak PT FAP, sangkan sagancangna ngalaksanakeun prosés pangwangunan Pasar Pelita Kota Sukabumi. Lantaran réa pihak anu nunggu jeung miharep hususna para padagang, sangkan prosés pangwangunan éta pasar téh bisa sagancangna dilaksanakeun. Sabab ku dilaksanakeunnana prosés pangqwangunan éta pasar téh, bisa méré harepan anyar ka warga masarakat Kota Sukabumi, hususna ka para padagang.