PAMARÉNTAH KOTA SUKABUMI JEUNG PT FAP GEUS NANDATANGAN MOU PANGWANGUNAN PASAR RAHAYAT MODÉREN KOTA SUKABUMI

Reporter : ENDANG SUMARDI

Pamaréntah Kota Sukabumi jeung PT FAP (Furtunindo Arta Perkasa), geus nandatangan MoU (Memorandum of Understanding) atawa Kasaluyuan Gawé Bareng Pangwangunan jeung Pangalolaan Pasar Rahayat Modéren Kota Sukabumi, dina tempat urut Pasar Pelita Kota Sukabumi. Panandatanganan éta MoU téh dilaksanakeun ku Walikota Sukabumi, H. Mohamad Muraz, S.H., M.M. katut Diréktur Utama PT FAP, Hartono, disaksian ku Wakil Walikota Sukabumi, H. Achmad Fahmi, S.Ag., M.M.Pd., Kapala BPKD (Badan Pangalolaan Kauangan Daérah) Kota Sukabumi, Drs. H. Dida Sembada, M.M., sarta Kapala Diskop UKM-PP (Dines Koprasi, Usaha Kecil Menengah, Perdagangan jeung Perindustrian) Kota Sukabumi, Drs. Ayép Supriatna, M.M., cindekna tanggal 16 Juni 2017, di Rohangan Utama Balé Kota Sukabumi. Hadir dina kasempetan éta, unsur Forkopimda (Forum Komunikasi Pimpinan Daérah), para Kapala OPD (Organisasi Parangkat Daérah), wawakil padagang sarta para tamu ondangan liana.

Walikota Sukabumi, H. Mohamad Muraz, S.H., M.M. ngajelaskeun, dilaksanakeunnana panandatanganan MoU Ngeunaan Kasaluyuan Gawé Bareng Pangwangunan jeung Pangalolaan Pasar Rahayat Modéren Kota Sukabumi di tempat urut Pasar Pelita Kota Sukabumi téh, lantaran PT FAP geus nyumponan pasaratan, nya éta nyimpen Duit Jaminan Pangwangunan anu gedéna Rp. 33 miliar di BTN (Bank Tabungan Nagara) Jakarta, sarta Bank Garansi di BJB (Bank Jabar Banten) Cabang Sukabumi anu gedéna Rp. 8,2 miliar leuwih.

Dina kasempetan éta, Walikota Sukabumi meredih ka PT FAP, sangkan sagancangna nyumponan supa-rupa pasaratan liana, malar prosés pangwangunan Pasar Rahayat Modéren Kota Sukabumi téh bisa sagancangna dilaksanakeun. Ngan pikeun ngasupkeun alat-alat beurat ka éta tempat urut Pasar Pelita Kota Sukabumi téh, kakara bisa dilaksanakeun dina tanggal 10 Juli 2017, lantaran aya Surat Ědaran Walikota Sukabumi, ngeunaan panartiban kandaraan beurat anu liwat ka satiap ruas jalan nu aya di wewengkon Kota Sukabumi, cindekna ti Ha min 7 nepi ka Ha pleus 7 Idul Fitri Taun 1438 Hijriyah.

Salian ti éta, Walikota Sukabumi ogé meredih ka PT FAP, sangkan teu ngalaksanakeun pamasaran kios atawa los ka para padagang, saméméh prosés pangwangunan Pasar Rahayat Modéren Kota Sukabumi ngahontal 30 peresén. Disagigireun ti éta, PT FAP ogé kudu salawasna ngalaksanakeun komunikasi jeung aparat instansi nu aya kaitannana jeung ka para padagang. Maksud jeung tujuannana, pikeun ngajaga hal-hal anu teu diharepkeun ku sakumna pihak, sarta pikeun ngarojong kalancaran prosés pangwangunan Pasar Rahayat Modéren Kota Sukabumi.