KAGIATAN PANGAMANAN DINA JERO TAUN 2017 IEU SAEUTIKNA AYA 3 POINT UTAMA ANU JADI PERHATIAN PERSIDÉN RI

Reporter : ENDANG SUMARDI

Sakumaha anu ditandeskeun ku Kapolri (Kapala Kapulisian Nagara Républik Indonésia), Jéndral Pulisi Drs. M. Tito Karnavian, M.A., Ph.D., kagiatan pangamanan dina jero taun 2017 ieu, saeutikna aya 3 point utama anu jadi perhatian Persidén RI, nya éta kajagana stabilitas harga pangan, kondisi Kamtibmas (Kaamanan jeung Katartiban Masarakat) anu kondusif, sarta kaamanan, kalancaran jeung kanyamanan arus mudik jeung arus balik.

Ěta Panandesan Kapolri téh, ditepikeun ku Walikota Sukabumi, H. Mohamad Muraz, S.H., M.M., dina biantara basa Apél Gelar Pasukan Oprasi Ramadniya Taun 2017 Tingkat Polres Sukabumi Kota, cindekna tanggal 19 Juni 2017, di Lapangan Merdéka Kota Sukabumi. Hadir dina kasempetan éta, Ketua DPRD Kota Sukabumi, Yunus Suhandi, S.IP., Dandim 0607 Kota Sukabumi, Létkol Inf. Mohammad Mahfud As’at, Kapolres Sukabumi Kota, AKBP Rustam Mansur, S.IK., sarta para tamu ondangan liana.

Salajuna ditandeskeun, dina ngawujudkeun stabilitas harga pangan, Polri geus ngabentuk Satgas Pangan, pikeun nalingakeun jeung ngajaga harga pangan supaya tetep stabil. Ěta usaha téh diwujudkeun ngaliwatan gawé bareng jeung kamentrian katut lembaga nu aya kaitannana, hususna dina nanjeurkeun hukum ka para palaku panimbunan, pangoplosan jeung pamalsuan, sarta tindak pidana jeung palanggaran lianna nu aya kaitannana jeung pangan.

Sedengkeun pikeun ngajaga kondisi Kamtibmas nu aman jeung kondusif, Kapolri ngingetan ka sakumna Kasatwil, supaya bisa neken angka kajahatan konnvensional, saperti Curat, Curas, Curanmor, Copet, Bius, Hipnotis jeung sajabana, ngaliwatan paningkatan kagiatan préémtif, prévéntif jeung réprésif. Disagigireun ti éta, Kapolri ogé neken ka sakumna réngréngan kapulisian, pikeun terus ngaronjatkeun kagiatan sambang jeung patroli di titik-titik rawan gangguan Kamtibmas, saperti Terminal, Palabuhan, Pamukiman, Puseur Tempat Balanja, Bank jeung ATM, sarta tempat-tempat wisata anu ramé dideugdeug ku warga masarakat dina waktu Idul Fitri.

Dina kasempetan éta, Walikota Sukabumi nyematkeun Pita Oprasi ka 4 urang wakil patugas, anu ngawengku ti unsur SUBDENPOM Sukabumi, Satlantas Polres Sukabumi Kota, Dines Perhubungan Kota Sukabumi jeung Satpol PP Kota Sukabumi. Salian ti éta, Walikota Sukabumi dibarengan ku Ketua DPRD Kota Sukabumi, Dandim 0607 Kota Sukabumi katut Kapolres Sukabumi Kota, ngecék sakumna sarana jeung prasarana Oprasi Ramadniya Taun 2017, anu baris digunakeun ku Polri, TNI, Dines Perhubungan jeung Satpol PP.