FASILITAS ROHANGAN ANYAR UNIT LUKA BAKAR RSUD R. SYAMSUDIN, S.H. KOTA SUKABUMI GEUS DIRESMIKEUN

Reporter : ENDANG SUMARDI

Fasilitas rohangan anyar Unit Luka Bakar  atawa Burn Centre RSUD (Rumah Sakit Umum Daérah) R. Syamsudin, S.H. Kota Sukabumi, ti rohangan heubeul ka rohangan anyar, geus diresmikeun ku Sekertaris Daérah Kota Sukabumi, Dr. H.M.N. Hanafie Zain, M.Si., cindekna tanggal 11 Juli 2017, anu ditandaan ku ngagunting pita. Lantaran éta fasilitas téh, geus aya jeung geus dioprasikeun 3 taun ka tukang, cindekna dina bulan Juli 2014.

Hadir dina kasempetan éta, Asistén Paékonomian jeung Pangwangunan Setda Kota Sukabumi, H. Dédén Soléhudin, S.Ag., M.M., Kapala Dines Kaséhatan Kota Sukabumi, dr. Hj. Ritanénny Ědlien Silyéna Mirah, Diréktur RSUD R. Syamsudin, S.H. Kota Sukabumi, dr. H. Bahrul Anwar, MKM., sarta Paramédis jeung para tamu ondangan liana.

Dina biantarana, Sekertaris Daérah Kota Sukabumi, Dr. H.M.N. Hanafie Zain, M.Si. ngajelaskeun, RSUD R. Syamsudin, S.H. Kota Sukabumi sabagé rumah sakit rujukan régional pikeun wewengkon Kota Sukabumi, Kabupatén Sukabumi, Kabupatén Cianjur jeung sabudeureunnana, terus usaha satékah polah jeung nyiptakeun rupa-rupa inovasi, dina méré palayanan anu hadé ka warga masarakat, ku nyumponan rupa-rupa kabutuhan fasilitas, diantarana fasilitas rohangan Unit Luka Bakar.

Sedengkeun saméméhna, RSUD R Syamsudin, S.H. Kota Sukabumi téh, geus muka palayanan jeung pangobatan panyakit jantung, ku ngawangun fasilitas rohangan unit Cath Lab, pikeun para pasén anu nandangan atawa katarajang gangguan jantung, sarta ngabogaan karep hayang masang ring jantung.

Salajuna Diréktur RSUD R. Syamsudin, S.H. Kota Sukabumi, dr. H. Bahrul Anwar, MKM. ngajelaskeun, fasilitas rohangan Unit Luka Bakar ieu téh, husus pikeun ngalayanan jeung ngarawat para pasén anu nandangan luka bakar, boh anu diakibatkeun ku seuneu jeung listrik boh anu diakibatkeun ku cai panas jeung bahan kimia.

Lian ti éta ogé dijelaskeun, dina ngalayanan jeung ngarawat para pasén anu nandangan luka bakar téh, baris diungkulan sacara husus ku para parawat anu geus dilatih kaparigelan dina ngungkulan luka bakar, sarta baris dipingpin langsung ku dokter ahli bedah palastik, nya éta ku dr. Aryanto Habibie jeung ku para dokter sepesialis séjénna nu aya di RSUD R. Syamsudin, S.H. Kota Sukabumi. Anapon fasilitas rohangan Unit Luka Bakar ieu téh, ngawengku 4 rohangan pasén, sarta dilengkepan ku fasilitas rohangan tunggu, pikeun anu nungguan éta pasén.