NASKAH PAJANGJIAN HIBAH DAÉRAH DANA PALAKSANAAN PAMILUKADA DI KOTA SUKABUMI GEUS DITÉKEN SACARA RESMI

Reporter : ENDANG SUMARDI

Naskah Pajangjian Hibah Daérah Dana Palaksanaan Pamilukada (Pamilihan Umum Kapala Daérah), di Kota Sukabumi geus ditéken sacara resmi ku Walikota Sukabumi, H. Mohamad Muraz, S.H., M.M. jeung Ketua KPU (Komisi Pamilihan Umum) Kota Sukabumi, Hamzah, S.Ag., cindekna tanggal 28 Juli 2017, di Rohangan Utama Balé Kota Sukabumi.

Ěta Naskah Pajangjian Hibah Daérah Dana téh, eusina nya éta Pamaréntah Kota Sukabumi méré hibah dana ka KPU Kota Sukabumi, pikeun ngawaragadan panyalagaraan Pamilukada sacara babarengan di Kota Sukabumi, anu baris dilaksanakeun dina taun 2017 jeung taun 2018 nu bakal datang.

Sedengkeun éta dana anu gedéna ngahontal Rp. 15.219.842.550,00 téh, nya éta sumberna tina APBD (Anggaran Pendapatan jeung Balanja Daerah) Kota Sukabumi, pikeun ngawaragadan sakabéh tahapan Pamilukada di Kota Sukabumi, boh keur balanja pagawé jeung balanja modal, boh keur balanja barang jeung jasa, kaasup jeung balanja honorarium.

Dina kasempetan éta, Walikota Sukabumi, H. Mohamad Muraz, S.H., M.M. ngajelaskeun, ku geus ditékenna Naskah Pajangjian Hibah Daérah Dana Palaksanaan Pamilukada téh, hartina geus aya kapastian dana anu dialokasikeun ku Pamaréntah Kota Sukabumi ka KPU Kota Sukabumi, pikeun ngawaragadan palaksanaan Pamilukada di Kota Sukabumi.

Tah kulantaran kitu, Walikota Sukabumi miharep sakaligus meredih ka KPU Kota Sukabumi, sangkan ngalaksanakeun koordinasi jeung BPKD (Badan Pangalolaan Kauangan Daérah) Kota Sukabumi, hususna dina hal nyairkeun éta dana, sangkan teu ngaganggu kana jadwal kagiatan di KPU.

Salian ti éta, Walikota Sukabumi ogé ngaharepkeun, sangkan palaksanaan Pamilukada sacara babarengan di Kota Sukabumi téh, bisa lumangsung kalayan lungsur-langsar taya halangan-harungan, ti mimiti prosés ngararancang nepi ka palaksanaan katut pananggungjawaban jeung évaluasi, luyu jeung padoman katut katangtuan aturan jeung undang-undang anu ditetepkeun.

Sedengkeun Ketua KPU Kota Sukabumi, Hamzah, S.Ag. ngajelaskeun, ku geus ditékenna Naskah Pajangjian Hibah Daérah Dana Palaksanaan Pamilukada ieu téh, jadi sala sahiji hal anu kacida pentingna pikeun KPU Kota Sukabumi, hususna dina panyalagaraan Pamilukada sacara babarengan di Kota Sukabumi, anu baris dilaksanakeun dina taun 2017 jeung taun 2018 nu bakal datang.

Anapon tahapan Pamilukada anu baris dilaksanakeun ku KPU Kota Sukabumi téh, nya éta ti mimiti ngararancang nepi ka palaksanaan katut pananggungjawaban jeung évaluasi. Tah kulantaran kitu, KPU Kota Sukabumi sabagé pihak anu narima éta hibah dana téh, dina ngagunakeunnana baris dilaksanakeun sacara éféktif jeung éfisien, luyu jeung padoman katut aturan sarta undang-undang anu ditetepkeun.

Hadir dina kasempetan éta, Ketua DPRD Kota Sukabumi, Yunus Suhandi, S.IP., unsur Forkopimda (Forum Koordinasi Pimpinan Daérah) Kota Sukabumi, Sekertaris Daérah Kota Sukabumi, Dr. H.M.N. Hanafie Zain, M.Si., para Asistén Daérah katut Staf Ahli Walikota Sukabumi, para Kapala OPD (Organisasi Parangkat Daérah), Kapala Bank BJB Puseur Kota Sukabumi, sarta para tamu ondangan liana.