DILAKSANAKEUNNANA MOU ANTARA POLITÉKNIK SUKABUMI JEUNG ALFĚD TĚH PIKEUN NGARONJATKEUN KASAJAHTRAAN PATANI

Reporter : ENDANG SUMARDI

Sekertaris Daérah Kota Sukabumi, Dr. H.M.N. Hanafie Zain, M.Si., salaku Ketua Yayasan Pendidikan Tinggi Kusumah Bangsa anu mayungan Politéknik Sukabumi jeung STIKES (Sekolah Tinggi Ilmu Keséhatan) Kota Sukabumi nandeskeun, dilaksanakeunnana MoU (Mémorandum of Understanding) atawa Nota Kasaluyuan Gawé Bareng antara Politéknik Sukabumi jeung ALFĚD (Association of Lectures for Finance and Ěconomic Development) téh, baris dipuseurkeun pikeun ngaronjatkeun kasajahtraan patani.

Sabab sakumna pihak di Kota Sukabumi ngabogaan kahayang, sangkan para patani di Kota Sukabumi bisa leuwih diperhatikeun. Lantaran satiap daérah bakal leuwih maju, saupama masih kénéh aya lahan tatanén jeung patani anu produktif.

Ěta panandesan Sekertaris Daérah Kota Sukabumi téh, ditepikeun basa ngahadiran Panandatangan MoU antara Politeknik Sukabumi jeung ALFĚD, cindekna tanggal 18 Agustus 2017, di Hotél Anugrah Kota Sukabumi. Hadir dina kasempetan éta, Kapala DKP-PP (Dines Katahanan Pangan, Pertanian jeung Perikanan) Kota Sukabumi, Ir. Hj. Kardina Karsoédi, M.T., réngréngan Politéknik Sukabumi jeung ALFĚD, katut para tamu ondangan séjénna.

Salajuna ditandeskeun, ALFĚD téh ngarupakeun asosiasi pangembangan ékonomi jeung finansial, anu anggotana ngawengku para dosén ti rupa-rupa universitas di Indonésia, anu mawa misi parobahan jeung ngabahas pamikiran katut tantangan édukasi kauangan di daérah.

Tah kulantaran kitu, sakumna kagiatan literasi anu dicalagarakeun ku ALFĚD téh, dirojong ku OJK (Otoritas Jasa Kauangan) Institute sarta Kemenristék PT (Kementrian Risét, Téknologi jeung Pendidikan Tinggi). Lian ti éta ogé ditandeskeun, hadirna asosiasi ieu di Kota Sukabumi téh, baris ngahirupkeun jeung ngamekarkeun usaha-usaha ékonomi jeung kauangan di daérah.

Disagigireun ti éta ogé diotandeskeun, pangembangan édukasi kauangan nu optimal, bisa ngawujud ku ayana sinkronisasi, antara pamaréntah jeung masarakat katut instansi jeung lembaga anu aya kaitannana.