KODIM 0607 KOTA SUKABUMI NGAWANGUN DEUI IMAH MILIK SALA SAURANG VĚTERAN

Reporter : ENDANG SUMARDI

Dina raraga miéling tepung taun ka 72 Kamerdékaan RI Taun 2017, sakaligus sabagé ranggeuyan kagiatan Karya Bhakti Sosial jeung Wujud Nyata Kapadulian Sosial Kodam (Komando Daérah Militér) III Siliwangi, Kodim (Komando Distrik Militér) 0607 Kota Sukabumi, ngabedah imah milik sala saurang janda sakaligus sala saurang Véteran, nya éta Ma Tiah anu umurna geus 83 taun, warga Kalurahan Nanggeléng, Kacamatan Citamiang, Kota Sukabumi.

Dandim  (Komandan Distrik Militér) 0607 Kota Sukabumi, Létkol Inf. Mohammad Mahfud As’at ngajelaskeun, Ma Tiah téh hirup nyorangan kalayan kaayaan imahna geus ngahariwangkeun sakumna pihak. Tah kulantaran kitu, sabagé Anggota TNI anu ngarasakeun jasa-jasa para Véteran, Dandim 0607 Kota Sukabumi katut réngréngannana usaha satékah polah ngabantu ngawangun deui imah milik Ma Tiah, sangkan kaayaannana leuwih hadé, leuwih séhat jeung leuwih genah dicicingannana.

Salajuna dijelaskeun, ngawangun deui imah milik Ma Tiah ieu téh, geus dimimitian ti tanggal 7 Agustus 2017. Salian ngawangun deui imah milik Ma Tiah téh, Kodim 0607 Kota Sukabumi ogé baris ngawangun deui 22 imah milik Véteran anu kaayaannana geus teu pantes dicicingan, di wewengkon Kota Sukabumi. Lian ti éta ogé dijelaskeun, nepi ka danget ieu, Kodim 0607 Kota Sukabumi geus hasil ngawangun deui sajumlah 5 unit imah di wewengkon Kota Sukabumi, nya éta di wewengkon Kalurahan Gedong Panjang jeung Kalurahan Nanggeléng Kacamatan Citamiang.

Leuwih jauh Dandim 0607 Kota Sukabumi ngajelaskeun, disagigireun ngawangun deui imah anu geus teu pantes dicicingan milik para Véteran, Kodim 0607 Kota Sukabumi ogé ngalaksanakeun Oprasi Katarak, Oprasi Minor, Sunatan Massal, Masrahkeun 1.000 Pakét Sembako (Sembilan Bahan Poko) ka warga masarakat anu kurang mampuh, sarta Méré Santunan ka 150 Budak Yatim Piatu.

Dandim 0607 Kota Sukabumi ngaharepkeun, ku dingawangunna deui imah anu geus teu pantes dicicingan milik para Véteran téh,bisa ngahudangkeun sumanget jeung jadi pecut pikeun pamaréntah, supaya bisa leuwih paduli ka para sesepuh hususna para Véteran, anu geus ilubiung dina majoangkeun Kamerdékaan Bangsa jeung Nagara RI. Disagigireun ti éta, Dandim 0607 Kota Sukabumi ogé ngaharepkeun ka sakumna lapisan warga masarakat Kota Sukabumi, sangkan salawasna silih bantu dina sagala rupa hal, hususna dina usaha ngabantu jeung ngahampangkeun kabeurat warga masarakat anu kurang mampuh, malar kahirupan jeung kasajahtraannana bisa ngaronjat.