SAKUMNA ASN DI KOTA SUKABUMI SANGKAN NGARONJATKEUN AJĚN PALAYANAN PUBLIK

Reporter : ENDANG SUMARDI

Walikota Sukabumi, H. Mohamad Muraz, S.H., M.M., miharep sakaligus nginstruksikeun ka sakumna ASN (Aparatur Sipil Nagara) di lingkungan Pamaréntah Kota Sukabumi, khususna nu aya kaitannana langsung jeung palayanan publik, sangkan usaha satékah polah méré sakaligus ngaronjatkeun ajén palayanan publik sacara optimal, luyu jeung prosedur sarta aturan jeung undang-undang anu ditetepkeun.

Salian ti éta, Walikota Sukabumi ogé nandaskeun, pihakna jeung aparat instansi nu aya kaitannana di lingkungan Pamaréntah Kota Sukabumi, moal bosen-bosen nindak sacara tegas ka satiap ASN di lingkungan Pamaréntah Kota Sukabumi, anu ngalanggar atawa nyéléwéng dina méré palayanan publik ka warga masarakat Kota Sukabumi, atawa teu salayu jeung aturan katut undang-undang anu ditetepkeun.

Ěta hal téh ditepikeun ku Walikota Sukabumi, dina biantara sakaligus muka sacara resmi Diklat (Pendidian jeun Palatihan) Palayanan Publik pikeun Aparatur ti satiap SKPD (Satuan Kerja Parangkat Daérah) jeung Unit Kerja Panyalagara Palayanan Publik di lingkungan Pamaréntah Kota Sukabumi, cindekna tanggal 3 Agustus 2017, di Hotél Maxoné Kota Sukabumi.

Walikota Sukabumi ngajelaskeun, dilaksanakeunnana Diklat Palayanan Publik pikeun Aparatur ti satiap SKPD jeung Unit Kerja Panyalagara Palayanan Publik di lingkungan Pamaréntah Kota Sukabumi téh, nya éta pikeun ngaronjatkeun élmu pangaweruh jeung wawasan sarta pamahaman jeung kaparigelan para ASN di lingkungan Pamaréntah Kota Sukabumi, hususna nu aya kaitannana jeung sagala rupa hal katut usaha dina ngaronjatkeun ajén palayanan publik di Kota Sukabumi, sala sahijina ku ngaronjatkeun ajén jeung kaparigelan ASN dina ngalaksanakeun palayanan publik.

Saterusna dijelaskeun, ASN atawa birokrasi pamaréntah anu méré palayanan sacara hadé jeung méré kasugemaan dina ngalaksanakeun palayanan publik, bisa ngarobah kultur warga masarakat jadi leuwih hadé. Lantaran warga masarakat baris nyaluyukeun diri jeung prosedur sarta aturan katut undang-undang anu ditetepkeun. Komo deui saupama éta aturan jeung undang-undang téh mihak jeung ngagampangkeun sarta nyugemakeun ka warga masarakat.

Hadir dina kasempetan éta, Asistén Deputi Koordinasi Palaksanaan Kawijakan jeung Ěvaluasi Palayanan Publik KemenPAN-RB (Kementrian Pendayagunaan Aparatur Nagara jeung Réformasi Birokrasi) RI, unsur Forkopimda (Forum Komunikasi Pimpinan Daérah) Kota Sukabumi, para Kapala SKPD, para Camat jeung Lurah, sarta para tamu ondangan lianna.