LINGKUNGAN NGABOGAAN HARTI ANU KACIDA GEDĚNA SARTA BISA NANGTUKAN HIRUP JALMA

Reporter : ENDANG SUMARDI

Sakumaha anu ditandeskeun ku Mentri Lingkungan Hirup jeung Kahutanan RI, Dr. Ir. Siti Nurbaya Bakar, M.Sc., lingkungan jeung alam ngabogaan harti anu kacida geděna sarta bisa nangtukan hirup jalma. Lantaran fungsi-fungsi alam téh digawé pikeun jalma, jeung jalma jadi bagian dina landscpae écology alam. Ěta panandesan Mentri Lingkungan Hirup jeung Kahutanan RI téh, ditepikeun ku Walikota Sukabumi, H. Mohamad Muraz, S.H., M.M., dina biantara basa miéling HLH (Hari Lingkungan Hirup) Sadunya Taun 2017 Tingkat Kota Sukabumi, cindekna tanggal 8 Agustus 2017, di Kantor DLH (Dines Lingkungan Hirup) Kota Sukabumi.

Anapon fungsi-fungsi alam téh, kahiji Fungsi Regulasi, nya éta  aya kaitannana jeung kapasitas ékosistem alam, pikeun ngatur prosés ékologis anu ésensial, pikeun ngarojong sistim kahirupan jeung mértahankeun kaséhatan lingkungan, ku nyadiakeun hawa anu bersih katut cai jeung tanah, sarta kadua Fungsi Mawa atawa Carrier tina alam, anu nyadiakeun rohang jeung bahan atawa médium anu saluyu pikeun aktivitas jalma, saperti pikeun rékréasi jeung pepelakan.

Saterusna katilu Fungsi Produksi Alam, anu nyadiakeun rupa-rupa sumber daya, ti mimiti pangan, bahan atah pikeun industri jeung énergi nepi ka material génetik, sarta kaopat Fungsi Informasi, nya éta alam méré kontribusi ka jalma, pikeun kaséhatan méntal jeung nyadiakeun kasempetan pikeun réfléksi, ngamulyakeun spiritual, ngawangun kognitif jeung pangalaman éstétika.

Salajuna ditandeskeun, kaopat éta fungsi alam téh, sacara utuh mangaruhan kana kahirupan jalma. Tah kulantaran kitu, téma anu diangkat ku Badan Lingkungan Hirup Dunya atawa UNĚP (United Nations Ěnvironment Programme) dina miéling HLH Sadunya Taun 2017 ieu téh cocog pisan, nya éta Connécting Péoplé to Nature atawa Ngahiji jeung Alam.

Sedengkeun Kapala DLH Kota Sukabumi, Drs. Adil Budiman, M.Si. ngajelaskeun, acara pangéling-ngéling HLH Sadunya Taun 2017 Tingkat Kota Sukabumi téh, dieusi ku rupa-rupa kagiatan. Diantarana Lomba Ngagambar Koléktif Tingkat SD, LCCL (Lomba Cerdas Cermat Lingkungan) Tingkat SMP, Lomba Poster Lingkungan Tingkat SMA jeung SMK, anu jumlah pamilonna ngahontal 170 urang.

Salian ti éta ogé dijelaskeun, dina acara pangéling-ngéling HLH Sadunya Taun 2017 Tingkat Nasional, tanggal 2 Agustus 2017, di Jakarta, Kota Sukabumi nyangking 2 layang pangajén, nya éta Piala Adipura pikeun kategori Kota Sedeng jeung SMA Negri 1 Kota Sukabumi nyangking layang pangajén Sakola Adiwiyata Mandiri, sarta Kota Sukabumi asup nominasi 40 besar nasional dina Nyusun DIK-PLHD (Dokumén Informasi Kinerja Pangalolaan Lingkungan Hirup Daérah).

Disagigireun ti éta, dina acara pangéling-ngéling HLH Sadunya Taun 2017 Tingkat Propinsi Jawa Barat, Kota Sukabumi nyangking 8 layang pangajén dina widang lingkungan hirup, nya éta pang hadéna ka 3 Nyusun DIK-PLHD, sarta 7 SD Negri nyangking layang pangajén Sakola Adiwiyata, nya éta SD Negri Cikolé 1, SD Negri Sukasirna, SD Negri Cimanggah, SD Negri Kebonjati, SD Negri Baros Kencana CBM (Citra Bina Mandiri), SD Negri Cisuda 1, jeung SD Negri Cicadas Girang.

Saterusna dijelaskeun, dina taun 2017 ieu, Kota Sukabumi ngirimkeun 2 RW, nya éta RW 1 Kalurahan Subangjaya Kacamatan Cikolé jeung RW 9 Kalurahan Babakan Kacamatan Cibeureum, pikeun miluan Program Kampung Iklim Tingkat Nasional, sarta geus divérifikasi ku tim ti KLHK (Kamentrian Lingkungan Hirup jeung Kahutanan) RI.