BPBD KOTA SUKABUMI NGOMÉAN IRIGASI JEUNG SALURAN CAI

Reporter : ENDANG SUMARDI

BPBD (Badan Pananggulangan Bencana Daérah) Kota Sukabumi, ngoméan irigasi jeung saluran cai, diantarana di wewengkon Cijeungjing Kacamatan Sukaraja Kabupatén Sukabumi. Anapon maksud jeung tujuannana, sakumaha anu dijelaskeun ku Kapala Unsur Palaksana BPBD Kota Sukabumi, Drs. Asép Suhéndrawan, nya éta pikeun nyumponan kabutuhan cai aréa pasawahan warga masarakat di wewengkon Kalurahan Babakan Kacamatan Cibeureum. Salian ti éta, BPBD Kota Sukabumi ogé terus usaha satékah polah ngalaksanakeun koordinasi jeung sakumna instansi katut lembaga anu aya kaitannana, kaasup jeung pihak kacamatan jeung kalurahan nu aya di Kota Sukabumi, hususna dina ngungkulan kagaringan akibat kahalodoan di wewengkon Kota Sukabumi, saperti kabutuhan cai pikeun nyaian aréa pasawahan jeung cai bersih pikeun kabutuhan sapopoé warga masarakat.

Nyigeung wewengkon anu rawan jeung remen kagaringan akibat tina kahalodoan di Kota Sukabumi, nurutkeun Kapala Unsur Palaksana BPBD Kota Sukabumi, dumasar kana data taun tukang kawilang réa pisan. Diantarana wewengkon Kalurahan Cisarua Kacamatan Cikolé, Kalurahan Gunung Puyuh, Kalurahan Karamat jeung Kalurahan  Karang Tengah Kacamatan Gunung Puyuh, sarta Kalurahan Sukakarya Kacamaatan Warudoyong. Salajuna wewengkon Kalurahan Nanggeléng jeung Kalurahan Cikondang Kacamatan Citamiang, Kalurahan Baros jeung Kalurahan Jayamekar Kacamatan Baros, Kalurahan Babakan, Kalurahan Cibeureum Hilir jeung Kalurahan Sindang Palay Kacamatan Cibeureum,  sarta Kalurahan Cipanengah, Kalurahan Sindangsari jeung Kelurahan Cikundul Kacamatan Lembursitu.

Saterusna dijelaskeun, pikeun wewengkon Kalurahan Cisarua, Kalurahan Karamat, Kalurahan Nanggeléng, Kalurahan Baros, Kalurahan Cibeureum Hilir, Kalurahan Babakan jeung Kalurahan Cipanengah, bangbaluh anu ditepikeun ku warga masarakat leuwih réa kana kabutuhan cai bersih. Sedengkeun pikeun wewengkon Kalurahan Gunung Puyuh, Kalurahan Karang Tengah, Kalurahan Sukakarya, Kalurahan Baros, Kalurahan Jayamekar, Kalurahan Cibeureum Hilir, Kalurahan Sindang Palay, Kalurahan Sindang Sari jeung Kalurahan Cikundul, bangbaluh anu ditepikeun ku warga masarakat leuwih réa kana kabutuhan cai pikeun nyaian aréa pasawahan.

Lian ti éta ogé dijelaskeun, pikeun nyumponan kabutuhan cai bersih warga masarakat, pihak BPBD Kota Sukabumi geus ngalaksanakeun koordinasi jeung pihak PDAM TBW (Pausahaan Daérah Air Minum Tirta Bumi Wibawa) Kota Sukabumi, diantarana ku nyieun sumur bor, sarta saluran pipah cai bersih supaya bisa asup ka lokasi warga masarakat anu rawan kajadian kagaringan. Sedengkeun pikeun nyumponan kabutuhan cai aréa pasawahan warga masarakat, pihak BPBD Kota Sukabumi geus ngalaksanakeun koordinasi jeung pihak DKP-PP (Dines Katahanan Pangan, Patanian jeung Paikanan) Kota Sukabumi. Sabab masalah kagaringan aréa pasawahan, bisa diakibatkeun ku sababaraha paktor, diantarana diakibatkeun caina euweuh jeung bisa diakibatkeun alatan mesin caina teu jalan atawa ruksak.