WALIKOTA SUKABUMI NGAWILUJENGKEUN SALAMET MIÉLING TEPUNG TAUN KA 72 PROPINSI JAWA BARAT TAUN 2017

Reporter : ENDANG SUMARDI

Walikota Sukabumi, H. Mohamad Muraz, S.H., M.M., Wakil Walikota Sukabumi, H. Achmad Fahmi, S.Ag., M.M.Pd. katut Sekertaris Daérah Kota Sukabumi, Dr. H.M.N. Hanafie Zain, M.Si., kalayan asmana pribadi katut Kapala Daérah sarta pamaréntah katut warga masarakat Kota Sukabumi, ngawilujengkeun salamet miéling tepung taun ka 72 Propinsi Jawa Barat Taun 2017. Salian ti éta ogé ngaharepkeun, sangkan Propinsi Jawa Barat ti waktu ka waktuna tetep leuwih hadé jeung leuwih maju dina sagala widang, anu pamustungannana Jawa Barat tetep jadi Jabar Kahiji jeung Jabar Ngahiji.

Ěta pangwilujeng salamet téh, ditepikeun saréngséna Apél Besar dina raraga Miéling Tepung Taun ka 72 Poé Jadi Propinsi Jawa Barat, cindekna tanggal 19 Agustus 2017, di Lapangan Gasibu, Jalan Diponegoro Kota Bandung. Apel anu dimimitian pukul 08.00 WIB kalayan lumangsung lungsur-langsar jeung hidmat téh, diiluan ku para Kapala Daérah Kabupatén jeung Kota sarta rébuan ASN (Aparatur Sipil Nagara) sa Jawa Barat, Pamaréntah Propinsi Jawa Barat sarta instansi lianna, saperti Kodam III Siliwangi, Polda Jabar jeung Kejati Jabar, kalayan maraké Pakéan Adat Sunda, nya éta lalaki maraké Iket, Baju Kamprét jeung Calana Pangsi, sarta wanoja maraké Cindung, Baju Kabaya jeung Samping.

Hadir dina kasempetan éta, Wakil Gubernur Jawa Barat, Pingpinan katut Anggota DPRD Propinsi Jawa Barat, unsur Forkopimda (Forum Komunikasi Pimpinan Daérah) Propinsi Jawa Barat, Sekertaris Daérah Propinsi Jawa Barat, Ketua katut Wakil Ketua TP PKK sarta Ketua DWP (Dharma Wanita Persatuan) Propinsi Jawa Barat, para Asistén Daérah katut para Kapala OPD (Organisasi Parangkat Daérah) Propinsi Jawa Barat, para Sekertaris Daérah katut Asistén Daérah sarta Kapala OPD Kabupatén jeung Kota sa Jawa Barat, para Pingpinan BUMN jeung BUMD, para Inohong Alim Ulama, Inohong Masarakat jeung Pamuda, sarta para tamu ondangan séjénna.

Gubernur Jawa Barat, Dr. H. Ahmad Héryawan, Lc., M.Si. salaku Pembina Apél ngajelaskeun, tumuwuh jeung maju sarta mekarna Propinsi Jawa Barat téh, ditandaan ku rupa-rupa prestasi, boh anu dicangking ku Propinsi Jawa Barat boh anu dicangking ku Kabupatén jeung Kota di Jawa Barat. Salajuna dijelaskeun, éta rupa-rupa prestasi téh, lain prestasi Gubernur Jawa Barat, tapi prestasi sakumna ASN jeung warga masarakat Propinsi Jawa Barat.

Salian ti éta ogé dijelaskeun, Tepung Taun Poé Jadi Propinsi Jawa Barat téh, ngan ukur ngabogaan jarak waktu 2 poé tina Poé Kamerdékaan RI. Tah kulantaran kitu, Gubernur Jawa Barat ngaharepkeun, sangkan sumanget pajoangan jeung kamerdékaan téh bisa ngarambah jeung salawasna ngagedur dina dada sakumna pihak, hususna dina dada sakumna ASN katut warga masarakat Jawa Barat, sabagé generasi panerus jeung pajoang bangsa.