PROGRAM CĚTĚK KOTA SUKABUMI MEUNANG PANGAJÉN 40 KARYA INOVASI PALAYANAN PUBLIK PANGHADÉNA TAUN 2017

Reporter : ENDANG SUMARDI

Program CĚTĚK (Cukup Ě-KTP jeung Kartuh Kulawarga) Pamaréntah Kota Sukabumi, meunang Pangajén 40 Karya Inovasi Palayanan Publik Panghadéna Taun 2017, pikeun Propinsi, Kabupatén jeung Kota katut Kamentrian jeung Lembaga sa Indonésia. Ěta pangajén téh dipasrahkeun ku Menko PMK (Mentri Koordinator Widang Pangwangunan Manusa jeung Kabudayaan) RI, Puan Maharani, ngawakilan Persidén RI, Ir. H. Joko Widodo, ka Walikota Sukabumi, H. Mohamad Muraz, S.H., M.M., katut para Gubernur, Bupati jeung Walikota sarta pawakilan Kamentrian jeung Lembaga, cindekna tanggal 25 Agustus 2017, dina acara Pekan Gawé Nyata Gerakan Révolusi Méntal, di Stadion Manahan Solo, Kota Surakarta, Propinsi Jawa Tengah.

Acara éta téh dihadiran ku kurang leuwih 15.000 urang, utusan ti Kamentrian jeung Lembaga, Pamaréntah Propinsi, Pamaréntah Kabupatén jeung Kota, Komunitas Warga Masarakat, Dunya Usaha, LSM (Lembaga Swadaya Masarakat), Alim Ulama, Inohong Masarakat, Pamuda jeung Wanoja, sarta Mahasiswa jeung para tamu ondangan lianna.

Satutas nampa éta pangajén, Walikota Sukabumi ngucap sukur alhamdulillah, yén Pamaréntah Kota Sukabumi meunang deui pangajén ti Pamaréntah Puseur, sabagé kota anu geus hasil nerapkeun Karya Inovasi Palayanan Publik sacara hadé, nya éta Program CĚTĚK Palayanan Kaséhatan Haratis, pikeun warga masarakat Kota Sukabumi.

Walikota Sukabumi ngajelaskeun, éta program téh saméméhna meunang Pangajén TOP 99 Inovasi Palayanan Publik sa Indonésia, anu diiluan ku 3.050 Inovasi Palayanan Publik, anu diajukeun ku satiap daérah Propinsi, Kabupatén jeung Kota katut Kamentrian jeung Lembaga sa Indonésia. Saterusna dijelaskeun, tina 99 Inovasi Palayanan Publik téh, dilaksanakeun deui pangajénan jadi 40 Karya Inovasi Palayanan Publik Panghadéna, diantarana Program CĚTĚK Pamaréntah Kota Sukabumi asup di jerona.

Lian ti éta ogé dijelaskeun, ka 40 Karya Inovasi Palayanan Publik téh ngawakilan kombinasi jeung kategori, kluster lembaga jeung kawilayahan. Anapon kategori jeung indikatorna, nya éta palayanan langsung, tata kalola pamaréntahan jeung parobahan sosial. Salajuna kluster lembaga, ngawengku Kamentrian, Lembaga, Kabupatén, Kota jeung BUMN. Sedengkeun pikeun kawilayahan, ngawengku Kelompok A, nya éta Sumatera, Jawa jeung Bali, Kelompok B, Kalimantan jeung Sulawesi, sarta Kelompok C, Maluku, Nusa Tenggara jeung Papua.

Salajuna dijelaskeun, éta pangajén téh ngarupakeun hasil jeung buah tina gawé rancagé sakumna pihak, nya éta Pamaréntah Kota Sukabumi jeung ilubiungna warga masarakat Kota Sukabumi kana éta program. Tah kulantaran kitu, Walikota Sukabumi kalayan asmana pribadi katut Kapala Daérah sarta Pamaréntah Kota Sukabumi, ngahaturkeun nuhun katut pangajén anu saluhur-luhurna ka sakumna pihak, hususna ka sakumna SKPD (Satuan Kerja Parangkat Daérah) jeung instansi katut lembaga nu aya kaitanana sarta ka sakumna lapisan warga masarakat Kota Sukabumi, sakaligus ngaharepkeun, sangkan sakumna pihak salawasna ilubiung jeung ngarojong kana panyalagaraan éta program. Salian ti éta, Walikota Sukabumi ogé ngaharepkeun, ku meunangna éta pangajén téh, bisa jadi pecut keur Pamaréntah Kota Sukabumi, pikeun salawasna jeung leuwih ngaronjatkeun gawé anu rancagé jeung palayanan anu hadé ka sakumna lapisan warga masarakat Kota Sukabumi.