WALIKOTA SUKABUMI NGAHATURKEUN NUHUN KA PERSIDÉN RI

Reporter : ENDANG SUMARDI

Walikota Sukabumi, H. Mohamad Muraz, S.H., M.M., ngahaturkeun wilujeng sumping sarta ngahaturkeun nuhun ka Persidén RI, Ir. H. Joko Widodo katut Ibu Nagara, Hj. Iriana Joko Widodo, sarta para Mentri, Staf Kapersidénan RI, Anggota DPRD RI, Gubernur Jawa Barat katut Unsur Forkopinda (Forum Komunikasi Pingpinan Daérah) Propinsi Jawa Barat, anu tos kersa rurumpaheun ngadongdon Kota Sukabumi, sakaligus masrahkeun Sértifikat Tanah Haratis ka 5.500 urang warga masarakat Kota Sukabumi jeung Kabupatén Sukabumi, cindekna tanggal 31 Agustus 2017, di Lapangan Sutadi Rono Dipuro Setukpa Lemdiklat Polri Sukabumi, sarta KIP (Kartuh Indonésia Pinter) ka 1.211 palajar SD, SMP, SMA jeung SMK sadarajat sa Kota Sukabumi, sacara simbolis ka 5 urang palajar, katut Sembako ka 789 urang panarima PKH (Program Kulawarga Harepan) sa Kota Sukabumi, di SMA Negri 1 Kota Sukabumi, Kalurahan Citamiang, Kacamatan Citamiang, Kota Sukabumi, sakaligus ngalaksanakeun Sholat Idul Adha Taun 1438 Hijriyah di Lapangan Merdéka Kota Sukabumi. Lian ti éta, Walikota Sukabumi ogé néda dihampura ka Persidén RI sarta ka Ibu Nagara katut rombongan, sabab dina sajero ngadongdon Kota Sukabumi téh pasti réa kakurangannana dina sagala widang. Ěta hal téh ditepikeun ku Walikota Sukabumi, dina biantara saméméh ngalaksanakeun Sholat Idul Adha.

Salajuna dijelaskeun, palaksanaan Sholat Idul Adha Taun 1438 Hijriyah di Lapangan Merdéka Kota Sukabumi ieu téh, jadi anu pang istiméwana sarta jadi sajarah pikeun warga masarakat Kota Sukabumi. Lantaran dihadiran sakaligus diiluan langsung ku Persidén RI sarta Ibu Nagara katut rombongan. Tah kulantaran kitu, Walikota Sukabumi ngaharepkeun, ku kahadiran Persidén RI sarta Ibu Nagara katut rombongan téh, bisa nambahan kana kabarokahan jeung kahadéan pikeun warga masarakat Kota Sukabumi.

Salian ti éta, Walikota Sukabumi ogé ngajelaskeun, lega wewengkon Kota Sukabumi téh ngan ukur 4.128 kilo meter pasagi, sarta jumlah padukmuk sagemblengna dina danget ieu aya 323 rébu jiwa, kalayan hirup rukun sauyunan, kacai jadi saleuwi ka darat jadi salebak, sareundeuk saigel sabobot sapihanéan, reugreug pageuh répéh rapih, luyu jeung Visi Pamaréntah Kota Sukabumi sarta Visi Walikota katut Wakil Walikota Sukabumi, nya éta Ku Iman jeung Taqwa Ngawujudkeun Pamaréntahan anu Rahmatan Lil Alamin.

Anapon prestasi anu geus kacangking ku Kota Sukabumi di Tingkat Nasional, beunang disebutkeun réa pisan. Diantarana waé Prédikat Opini WTP (Wajar Tampa Pangacualian) pikeun katilu kalina sacara terus-terusan, SAKIP (Sistim Akuntabilitas Kinerja Instansi Pamaréntah) meunang prédikat BB, LAKIP (Laporan Akuntabilitas Kinerja Instansi Pamaréntah) meunang kategori Kabupatén jeung Kota pang hadéna sa Indonésia, Piala WTN (Wahana Tata Nugraha) pikeun ka 16 kalina, Piala Adipura kategori Kota Sedeng pikeun ka 5 kalina sacara terus-terusan, LSS (Lomba Sakola Séhat), Sakola Adiwiyata Mandiri, Kota Séhat, KLA (Kota Layak Anak), sarta Program CĚTĚK (Cukup Ě-KTP jeung Kartuh Kulawarga) Palayanan Haratis Kaséhatan pikeun warga masarakat Kota Sukabumi di RSUD (Rumah Sakit Umum Daérah) AL-Mulk Kota Sukabumi, asup Top 40 Karya Inovasi Palayanan Publik Panghadéna Taun 2017, pikeun Propinsi, Kabupatén jeung Kota katut Kamentrian jeung Lembaga sa Indonésia.