DISKOMINFO JEUNG PERSANDIAN KABUPATÉN SUKABUMI NYALAGARAKEUN KUNKER KA DISKOMINFO KOTA SUKABUMI

Reporter : ENDANG SUMARDI

Diskominfo (Dines Komunikasi Informatika) jeung Persandian Kabupatén Sukabumi, nyalagarakeun Kunker (Kunjungan Kerja) sakaligus diajar Pangwangunan jeung Pangembangan Smart City ka Diskominfo Kota Sukabumi. Kagiatan anu lumangsung poé Senén, 4 Séptémber 2017 ieu téh, dipingpin langsung ku Kapala Diskominfo jeung Persandian Kabupatén Sukabumi, H. Akhmad Riyadi, ATD., MBA., MM., sarta ditarima sacara resmi ku PLH Kapala Diskominfo Kota Sukabumi, Drs. H. Iing Abdullatief Rahmat, dibarengan ku Kapala Widang Informasi Diskominfo Kota Sukabumi, H. Yuli Noviawan, S.T., M.T. katut Kapala Bidang Komunikasi jeung Statistik Diskominfo Kota Sukabumi, Tantan Sontani, S.IP., M.Si., di Rohangan Rapat  Diskominfo Kota Sukabumi.

Dina kasempetan éta, Kapala Diskominfo jeung Persandian Kabupatén Sukabumi, H. Akhmad Riyadi, ATD., MBA., MM. ngajelaskeun, dumasar kana Perda (Peraturan Daérah) Kabupatén Sukabumi Nomer 7 Taun 2016 ngeunaan Pembentukan jeung Sususnan Parangkat Daérah Pamaréntah Kabupatén Sukabumi jeung Peraturan Bupati Sukabumi Nomer 60 Taun 2016 ngeunaan Struktur Organisasi sarta Tata Kerja Diskominfo jeung Persandian Kabupatén Sukabumi, Diskominfo jeung Persandian Kabupatén Sukabumi ngabogaan tugas ngabantu Bupati Sukabumi ngalaksanakeun urusan pamaréntahan anu jadi kawenangan daérah jeung tugas pembantuan dina widang komunikasi, informatika, statistik jeung persandian.

Tah kulantaran kitu, dina raraga konsultasi jeung koordinasi palaksanaan tugas poko sarta fungsi Diskominfo jeung Persandian Kabupatén Sukabumi, nyalagarakeun Kunker sakaligus diajar Pangwangunan jeung Pangembangan Smart City ka Diskominfo Kota Sukabumi. Lantaran Pamaréntah Kota Sukabumi geus siap nuju 100 Smart City,  sarta asup réngking 8 tina 25 kota jeung kabupatén di Indonésia, anu jadi Pilot Projéct atawa Conto Proyék Smart City di Indonésia. Salajuna dijelaskeun, hasil Kunker ti Diskominfo Kota Sukabumi téh, baris diterapkeun jeung dimekarkeun di Kabupatén Sukabumi, malar Kabupatén Sukabumi bisa sajajar jeung kota katut kabupatén séjénna di Indonésia, hususna nu jadi Pilot Projéct Smart City di Indonésia.

Sedengkeun PLH Kapala Diskominfo Kota Sukabumi, Drs. H. Iing Abdullatief Rahmat ngajelaskeun, Smart City téh nya éta Konsép Kota Cerdas, anu dirancang pikeun ngabantu sagala rupa kagiatan warga masarakat, hususna dina ngalola sumber daya nu dipibanda, sarta pikeun ngagampangkeun warga masarakat dina ngaaksés rupa-rupa béja jeung béwara anu dibutuhkeun. Saterusna dijelaskeun, dina taun 2017 ieu, Kota Sukabumi asup réngking 8 kota tina 25 kota jeung kabupatén sa Indonésia, nu jadi Pilot Projéct Smart City di Indonésia. Anapon ka 25 kota jeung kabupatén sa Indonésia éta téh, kapilih dina kagiatan Assessmént Gerakan Nuju 100 Smart City, anu dilaksanakeun ku Kemenkominfo (Kementrian Komunikasi jeung Informatika), gawé bareng jeung Kemendagri (Kementrian Dalem Negri), KemenPAN-RB (Kementrian Pandayagunaan Aparatur Nagara jeung Répormasi Birokrasi), KemenPPN / Bappenas (Kementrian Perencenaan Pembangunan Nasional / Badan Perencanaan Pembangunan Nasional), KemenPU-PR (Kementrian Pekerjaan Umum jeung Perumahan Rayat), sarta Kantor Staf Persidén.

Salajuna Kapala Widang Informasi Diskominfo Kota Sukabumi, H. Yuli Noviawan, S.T., M.T. ngajelaskeun, Pamaréntah Kota Sukabumi geus siap nuju 100 Smart City. Sabab sakumna OPD (Organisasi Parangkat Daérah) sarta Kacamatan jeung Kalurahan di lingkungan Pamaréntah Kota Sukabumi geus ngabogaan aplikasi sorangan, sarta keur diintegrasikeun dina hiji sistim. Maksud jeung tujuanana, sangkan sakumna lapisan warga masarakat bisa leuwih gampang ngaaksés rupa-rupa béja jeung béwara anu dibutuhkeun. Saterusna dijelaskeun, Pingpinan Daérah di Kota Sukabumi kacida ngarojong jeung konsén pisan pikeun ngawujudkeun Smart City di Kota Sukabumi, luyu jeung gancangna katut kamekaran téknologi informasi danget ieu.

Lian ti éta, Kapala Widang Komunikasi jeung Statistik Diskominfo Kota Sukabumi, Tantan Sontani, S.IP., M.Si. ngajelaskeun, usaha pikeun ngawujudkeun Smart City di Kota Sukabumi anu dilaksanakeun ku Pamaréntah Kota Sukabumi téh, salian ti ngamangpaatkeun infrastruktur jeung suprastruktur anu dipibanda danget ieu, ogé nguntun gawé bareng jeung pihak sawasta, hususna dina nyadiakeun alat palayanan téknologi informasi, nya éta ngawangun alat palayanan internét haratis pikeun warga masarakat di sajumlah rohangan publik, saperti di Taman Lapangan Merdéka, Taman Urang, Taman Cikondang, Setda (Sekertariat Daérah) Kota Sukabumi, Dispusip (Dines Perpustakaan Umum jeung Kaarsipan) Kota Sukabumi, sarta dina waktu anu deukeut baris diwangun di aréa Terminal Tipeu A. K.H. Ahmad Sanusi Kota Sukabumi, anu pernahna di Jalan Lingkar Selatan Kota Sukabumi. Disagigireun ti éta, ogé ngamangpaatkeun poténsi Paguron Luhur nu aya di Kota Sukabumi, saperti Politéknik Sukabumi jeung UMMI (Universitas Muhammadiyah Sukabumi), pikeun ngamaksimalkeun poténsi nu aya di Kota Sukabumi, pikeun leuwih ngagampangkeun palayanan publik, ku jalan ngamangpaatkeun téknologi informasi.