PULUHAN RÉBU UMAT ISLAM KOTA SUKABUMI MAPAG TAUN ANYAR ISLAM 1 MUHARRAM 1439 HIJRIYAH

Reporter : ENDANG SUMARDI

Puluhan rébu Umat Islam Kota Sukabumi, mapag sakaligus ngareuah-reuah datangna Taun Anyar Islam, 1 Muharram 1439 Hijriyah, ku cara milu Pawéy Taaruf, Takbir, Pawéy Obor jeung Dulag, cindekna dina malem Kemis, 20 Séptémber 2017, anu dimimitian ti pukul 7 nepi ka pukul 10 peuting.

Ěta kegiatan téh dilepas sacara resmi ku Walikota Sukabumi, H. Mohamad Muraz, S.H., M.M., dibarengan ku Wakil Walikota Sukabumi, H. Achmad Fahmi, S.Ag., M.M.Pd., Sekertaris Daérah Kota Sukabumi, Dr. H.M.N. Hanafie Zain, M.Si., katut unsur Forkopimda (Forum Komunikasi Pimpinan Daérah) Kota Sukabumi, sarta ditarima sacara resmi di Panggung Kahormatan, Jalan R. Syamsudin, S.H., cindekna di hareupeun Balé Kota Sukabumi. Hadir dina kasempetan éta, para Asistén Daérah katut Setap Ahli Walikota Sukabumi, para Kapala SKPD (Satuan Kerja Parangkat Daérah), BUMN jeung BUMD, para Alim Ulama, Inohong Masarakat, Wanoja jeung Pamuda, sarta para tamu ondangan lianna.

Anapon ruteu éta pawéy téh, nya éta start ti Lapangan Merdéka Kota Sukabumi, saterusna mapay Jalan Perintis Kemerdékaan, Jalan A. Yani, Jalan Gudang, Jalan R.Ě. Martadinata, Jalan Siliwangi, Jalan R. Syamsudin, S.H., Jalan Suryakencana, Jalan Perintis Kemerdékaan, jeung finish di Lapangan Merdéka Kota Sukabumi.

Salajuna urutan pamilon éta pawéy téh, nya éta nu mawa Bendera Merah Putih jeung Bendera Pamaréntah Kota Sukabumi katut Bendera MUI (Majelis Ulama Indonésia) Kota Sukabumi ku RMA (Remaja Masjid Agung) Kota Sukabumi, saterusna Marching Band Gema Swara Korpri Kota Sukabumi, TNI, Polri, Satpol PP, Kantor Kemenag, Ormas Islam, Palajar SMA, SMK jeung MA, Majelis Talim, Pondok Pasantrén, Kafilah Kacamatan Cikolé, Kacamatan Citamiang, Kacamatan Gunungpuyuh, Kacamatan Warudoyong, Kacamatan Cibeureum, Kacamatan Baros jeung Kacamatan Lembursitu, sarta Patwal Dines Pahubungan, Ambulan jeung Pamadam Kabakaran BPBD (Badan Pananggulangan Bencana Daérah) Kota Sukabumi.

Sedengkeun saméméhna, dilaksanakeun Sujud Sukur di Masijid Agung Kota Sukabumi, anu dimimitian ti pukul 5 soré nepi ka pukul 7 peuting, kalayan dieusi ku Istigosah jeung Doa Ahir Taun, Sholat Maghrib, Doa Awal Taun jeung Tausiyah Muharom, sarta Sholat Isa.

Dina kasempetan éta, Walikota Sukabumi ngaturkeun nuhun katut pangajén anu saluhur-luhurna ka para pamilon, anu geus ilubiung sacara aktif milu kana éta pawéy di Kota Sukabumi. Salajuna dijelaskeun, pihak pamaréntah jeung warga masarakat Kota Sukabumi, hususna para alim ulama jeung inohong masarakat, salawasna usaha satékah polah mapag sakaligus ngareuah-reuah taun anyar Islam sacara rutin satiap taun. Maksud jeung tujuanana, malar sakumna Umat Islam di Kota Sukabumi, bisa nyoréang ka tukang kana sagala rupa kakurangan jeung kaleuwihan, dina ngojayan rupa-rupa kahirupan salila sataun ka tukang, pikeun salajuna dijadikeun paradigma hijrah ka nu leuwih hadé deui dina taun-taun ka hareupna.