WAKIL WALIKOTA SUKABUMI NGAHADIRAN KONGRÉS JEUNG SHARING BÉST PRACTICE CITYNÉT INDONÉSIA TAUN 2017

Reporter : ENDANG SUMARDI

Wakil Walikota Sukabumi, H. Achmad Fahmi, S.Ag., M.M.Pd., dibarengan ku Kapala Bagian Paékonomian, Pangwangunan jeung Kerjasama Daérah Setda Kota Sukabumi, Rahmat Sukandar, S.Si., M.T., M.Sc., ngahadiran Kongrés jeung Sharing Bést Practice Citynét Indonésia Taun 2017, anu dilaksanakeun salila 3 poé, cindekna ti tanggal 2 nepi ka tanggal 4 Oktober 2017, di Hotél Novotél Kota Balikpapan, Kalimantan Timur.

Ěta kongrés téh dibuka sacara resmi ku Deputi Sekjén (Sekertaris Jéndral) Citynét Asia Pasifik, Dr. Ir. Aisa Tobing, M.Sc., MCP., anu ditandaan ku Nakol Goong, sarta diiluan ku sajumlah Bupati katut Walikota, hususna ti 23 Kabupatén jeung Kota Anggota Citynét Indonésia.

Wakil Walikota Sukabumi ngajelaskeun, Citynét Indonésia téh ngarupakeun sala sahiji wahana kagiatan anu ngabogaan jejaring atawa networking, antara anggota jeung staké holders, pikeun silih tukeuran bést practices atawa pangalaman kasuksésan masing-masing daérah. Maksud jeung tujuanana, nya éta pikeun nguatan daérah, dina ngaronjatkeun kapasitas pangwangunan anu terus-terusan jeung ngabogaan wawasan lingkungan, pikeun kasajahtraan warga masarakat. Salian ti éta, ogé pikeun nyadiakan béwara, sarta nyalagarakeun risét jeung studi banding.

Sedengkeun rohang lingkup kagiatan anu dilaksanakeun ku Citynét Asia Pasifik jeung Citynét Indonésia téh, diantarana capacity building, nya éta mangrupa kagiatan palayanan jeung konsultasi, palatihan téhnis, seminar jeung workshop, boh sacara nasional boh sacara internasional, sarta program oriéntasi jeung diskusi, studi banding, panalitian, program silih tukeuran pangalaman jeung béwara, hususna dina ngalaksanakeun pangalolaan pangwangunan.

Saterusna diungkabkeun, Kota Sukabumi téh ngarupakeun sala sahiji kota anu jadi lulugu dina ngadegkeun Citynét Indonésia, babarengan jeung 8 kota séjénna di Indonésia, sakaligus ngadéklarasikeun ngadegna Citynét Indonésia di Kota Sukabumi, cindekna dina tanggal 27 Désémber 2006 anu geus kaliwat.

Dina éta kongrés téh, dilaksanakeun Pamilihan Pangurus Citynét Indonésia Periodeu Taun 2017-2021, nya éta, Pembina, Citynét Asia Pasifik, Ketua Déwan Panaséhat, Walikota Balikpapan, Kalimantan Timur, Wakil Ketua Déwan Panaséhat, Walikota Tomohon, Sulawesi Utara, sarta Anggota, Walikota Pangkal Pinang, Kapulowan Bangka Belitung, Walikota Semarang, Jawa Tengah, katut Walikota Bogor, Jawa Barat.

Salajuna Déwan Pangurus, Persidén, Bupati Sidoarjo, Jawa Timur, Wakil Persidén 1, Walikota Banjar Baru, Kalimantan Selatan, Wakil Persidén 2, Walikota Sukabumi, Jawa Barat, Sekertaris 1, Sekertaris Daérah Kabupatén Sidoarjo, Sekertaris 2, Kapala Bappeda (Badan Perencanaan Pembangunan Daerah) Kabupatén Sidoarjo, Bendahara, Kapala BPKAD (Badan Pangalola Kauangan jeung Asét Daérah) Kabupatén Sidoarjo, Diréktur Administrasi, Ari Suryono jeung Sigit Setyawan, sarta Diréktur Program, Kapala Bagian Tata Pamaréntahan Setda Kabupatén Sidoarjo.