PAMARÉNTAH KOTA SUKABUMI MEUNANG PANGAJÉN SARTA HADIAH HIJI MOBIL JEUNG HIJI MOTOR

Reporter : ENDANG SUMARDI

Pamaréntah Kota Sukabumi meunang pangajén sarta hadiah hiji mobil jeung hiji motor, ti Pamaréntah Propinsi Jawa Barat. Lantaran Kota Sukabumi jadi kota pang hadéna, dina ngalaksanakeun Inténsifikasi Pamulutan PKB (Pajeg Kandaraan Bermotor) di Jawa Barat. Ěta pangajén jeung hadiah téh, ditarima langsung ku Walikota Sukabumi, H. Mohamad Muraz, S.H., M.M., cindekna tanggal 9 Oktober 2017, di Kantor Bapenda (Badan Pendapatan Daérah) Propinsi Jawa Barat.

Dina kasempetan éta, Walikota Sukabumi meunang kapercayaan ti Pamaréntah Propinsi Jawa Barat, pikeun maparkeun Sinergitas Antara CPPD (Cabang Pelayanan Pendapatan Daérah) jeung Kapala Daérah, hususna dina usaha nyukséskeun pamulutan jeung panarimaan PKB di Kabupatén jeung Kota di Jawa Barat.

Salajuna dijelaskeun, Pamaréntah Kota Sukabumi salawasna usaha satékah polah ngadorong jeung nyukséskeun pamulutan PKB di Kota Sukabumi, gawé baréng jeung Kantor CPPD Kota Sukabumi. Maksud jeung tujuanana, sabagé sala sahiji usaha pikeun ngaronjatkeun PAD (Pendapatan Asli Daérah) Kota Sukabumi, ngaliwatan anggaran bagi hasil jeung Bapenda Propinsi Jawa Barat. Sabab hasil tina pamulutan jeung pangumpulan PKB itéh, aya bagian keur daérah gedéna 30 peresén, tina total hasil pamulutan jeung pangumpulan PKB di daérahna masing-masing, pikeun digunakeun biaya pangwangunan.

Walikota Sukabumi nandeskeun, Kota Sukabumi jadi kota pang hadéna dina ngalaksanakeun Inténsifikasi Pamulutan PKB di Jawa Barat téh, ngarupakeun hasil gawé anu rancagé sakumna pihak, nya éta Pamaréntah Kota Sukabumi jeung OPD (Organisasi Perangkat Daérah) nu aya kaitanana, sarta Kantor CPPD Kota Sukabumi jeung sakumna lapisan warga masarakat hususna para wajib PKB di Kota Sukabumi.

Tah kulantaran kitu, Walikota Sukabumi kalayan asmana pribadi katut Kapala Daérah sarta Pamaréntah Kota Sukabumi, ngahaturkeun nuhun katut pangajén anu saluhur-luhurna ka sakumna pihak, hususna ka para wajib PKB di Kota Sukabumi, kana kasadaran jeung kapatuhanana dina mayar PKB sacara tepat waktu.

Saterusna diharepkeun, kasadaran jeung kapatuhan warga masarakat Kota Sukabumi dina mayar PKB sacara tepat waktu téh, sangkan salawasna dijaga jeung dironjatkeun dina satiap taunna. Lantaran hasil tina pamulutan jeung panarimaan PKB téh, gedéna 30 peresén dibalikeun deui ka Pamaréntah Kota Sukabumi, pikeun digunakeun biaya pangwangunan.