KAPALA DISKOMINFO KOTA SUKABUMI JADI NARA SUMBER FGD SMART CITY

Reporter : ENDANG SUMARDI

Kapala Diskominfo (Dines Komunikasi jeung Informatika) Kota Sukabumi, Drs. H. Sukarman, M.Pd., dibarengan ku Kapala Widang Infrastruktur TIK (Téknologi, Informasi jeung Komunikasi), Pasandian jeung Integrasi Data Diskominfo Kota Sukabumi, H. Yuli Noviawan, S.T., M.T., jadi nara sumber FGD (Focus Group Discussion) Smart City, anu ngangkat téma, Peluang jeung Tangtangan Nuju Smart City, dina raraga kagiatan Gerakan Nuju 100 Smart City di Indonésia. Sedengkeun nara sumber séjénna dina kagiatan FGD Smart City ieu téh, nya éta ti Kabupatén Sléman, Kota Banjarmasin, Kota Cirebon, jeung Kota Mimika.

FGD Smart City anu dicalagarakeun ku Kemenkominfo (Kementrian Komunikasi jeung Informatika) RI, cindekna tanggal 17 Oktober 2017, di Pusdiklat (Puseur Pendidikan jeung Palatihan) TIK Kemenkominfo RI Jakarta ieu téh, dibuka sacara resmi ku Sfaf Ahli Widang Téknik Kemenkominfo RI, nya éta Walikota Tangerang Selatan, Hj. Airin Rachmi Diany Wardana, S.H., M.H., sarta dihadiran ku 25 kota jeung kabupatén sa Indonésia anu lulus seléksi ku Kemenkominfo RI taun 2017, katut para pembimbing ti Kompas Gramédia Jakarta.

Anapun maksud jeung tujuan dilaksanakeunana FGD Smart City ieu téh, nya éta pikeun silih bagi élmu pangaweruh jeung pangalaman, dina ngawujudkeun smart city, hususna di 25 kota jeung kabupatén sa Indonésia anu lulus seléksi ku Kemenkominfo RI taun 2017. Salian ti silih bagi élmu pangaweruh jeung pangalaman, ogé dieusi ku sajumlah ranggeuyan kagiatan, diantarana Bimték (Bimbingan Téknis) pikeun nyieun masterplan smart city jeung nyusun buku quickwin smart city, sabagé léngkah inisiatif anu babari jeung gancang pikeun ngawujudkeun smart city.

Kapala Diskominfo Kota Sukabumi ngajelaskeun, Pamaréntah Kota Sukabumi geus siap nuju 100 Smart City. Lantaran sakumna SKPD (Satuan Kerja Parangkat Daérah) di lingkungan Pamaréntah Kota Sukabumi geus ngabogaan aplikasi sorangan, sarta keur diintegrasikeun dina hiji sistim. Maksud jeung tujuanana, supaya sakumna lapisan warga masarakat bisa leuwih gampang ngaaksés rupa-rupa béja jeung béwara anu dibutuhkeun.

Disagigireun ti éta ogé dijelaskeun, Pingpinan Daérah di Kota Sukabumi kacida ngarojong jeung museur pisan ngawujudkeun Smart City di Kota Sukabumi, luyu jeung gancangna katut mekarna téknologi informasi danget ieu. Anapon usaha pikeun ngawujudkeun Smart City di Kota Sukabumi téh, nya éta salian ti ngamangpaatkeun infrastruktur jeung suprastruktur anu dipibanda danget ieu, Pamaréntah Kota Sukabumi ogé nguntun gawé bareng jeung pihak swasta, hususna dina ngaronjatkeun palayanan téknologi informasi, ku jalan ngawangun sababaraha titik palayanan internét haratis pikeun warga masarakat di rohang-rohang publik di Kota Sukabumi, sarta ngamangpaatkeun poténsi Paguron Luhur nu aya di Kota Sukabumi, saperti Politéknik Sukabumi jeung UMMI (Universitas Muhammadiyah Sukabumi).