PAMARÉNTAH KOTA SUKABUMI MEUNANG LAYANG PANGAJÉN KU GEUS HASILNA NYUSUN LKPD TAUN 2016

Reporter : ENDANG SUMARDI

Pamaréntah Kota Sukabumi meunang Layang Pangajén ti Pamaréntah RI, ku geus hasilna nyusun LKPD (Laporan Kauangan Pamaréntah Daérah) Taun 2016, anu ngahontal Standar Pangluhurna. Ěta Layang Pangajén téh, dipasrahkeun ku Kapala Kanwil Ditjén (Kantor Wilayah Diréktorat Jéndral) Pabendaharaan Propinsi Jawa Barat, Yuniar Yanuar Rasyid, A.K., M.M., ka Walikota Sukabumi, H. Mohamad Muraz, S.H., M.M., kalayan disaksian ku Sekertaris Daérah Propinsi Jawa Barat, Dr. H. Iwa Karniwa, S.Ě., A.K., M.M., C.A., PIA., katut Kapala BPK (Badan Pamariksa Kauangan) RI Pawakilan Propinsi Jawa Barat, Arman Syifa, S.ST., M.Acc., Ak., dina Rakor (Rapat Koordinasi) Kanwil Ditjén Pabendaharaan Propinsi Jawa Barat Taun 2017, jeung Pamaréntah Daérah Propinsi Jawa Barat sarta Pamaréntah Daérah Kota katut Pamaréntah Daérah Kabupatén sa Jawa Barat.

Ěta Rakor anu lumangsung tanggal 17 Oktober 2017, di Aula Utama Gedong Dwi Warna, Jalan Diponegoro Nomer 59 Bandung téh, dibuka sacara resmi ku Asistén Daérah Widang Administrasi Setda Propinsi Jawa Barat, Dr, H. Muhamad Solihin, M.Si. Hadir dina kasempetan éta, Kapala Bapenda (Badan Pendapatan Daérah) Propinsi Jawa Barat, para Bupati katut Walikota sarta para Kapala BPKD (Badan Pangalolaan Kauangan Daérah) Kabupatén jeung Kota sa Jawa Barat, sarta para tamu ondangan liana.

Walikota Sukabumi, H. Mohamad Muraz, S.H., M.M., dibarengan ku Kapala BPKD Kota Sukabumi, Drs. H. Dida Sembada, M.M. ngajelaskeun, Pamaréntah Kota Sukabumi meunang Layang Pangajén ti Pamaréntah RI ku geus hasilna nyusun LKPD Taun 2016 anu ngahontal Standar Pangluhurna téh, ngarupakeun hasil gawé anu rancagé sakumna pihak, nya éta Pamaréntah Kota Sukabumi, BPKD Kota Sukabumi jeung sakumna SKPD (Satuan Kerja Parangkat Daérah) di lingkungan Pamaréntah Kota Sukabumi, dina ngalaksanakeun pangalolaan, palaporan jeung pananggungjawaban kauangan sacara hadé jeung bener.

Salajuna diharepkeun, ku geus meunangna ieu Layang Pangajén téh, sakumna réngréngan Pamaréntah Kota Sukabumi, sangkan salawasna usaha satékah polah mertahankeun sakaligus ngaronjatkeun kinerja, hususna dina ngalaksanakeun pangalolaan, palaporan jeung pananggungjawaban kauangan ka nu leuwih hadé deui. Salian ti éta, ogé kudu salawasna dijadikeun pecut dina ngaronjatkeun profesionalismeu, pangadalian intéren jeung integritas pangalolaan anggaran jeung barang, pikeun leuwih éfisien, éféktif, transparan jeung akuntabel, nuju Pamaréntahan Kota Sukabumi anu Rahmatan Lil Alamin.