WALIKOTA SUKABUMI NYANANGKEUN AKSI NASIONAL PEMBERANTASAN OBAT ILÉGAL

Reporter : ENDANG SUMARDI

Walikota Sukabumi, H. Mohamad Muraz, S.H., M.M., nyanangkeun Aksi Nasional Pemberantasan Obat Ilégal jeung Panyalahgunaan Obat di Kota Sukabumi, anu ditangaraan ku nakol goong jeung panandatanganan komitmen ku Walikota Sukabumi, Wakil Walikota Sukabumi, H. Achmad Fahmi, S.Ag., M.M.Pd., unsur Forkopimda (Forum Komunikasi Pimpinan Daérah) Kota Sukabumi, Sekertaris Daérah Kota Sukabumi, Dr. H.M.N. Hanafie Zain, M.Si., Asistén Paékonomian jeung Pangwangunan Setda Kota Sukabumi, H. Dédén Soléhudin, S.Ag., M.M., Kapala Balé Besar POM (Pangawas Obat jeung Makanan) Bandung, para Kapala OPD (Organisasi Parangkat Daérah), para Pingpinan Fasilitas Palayanan Kaséhatan jeung para tamu ondangan liana, cindekna tanggal 16 Oktober 2017 nu anyar kaliwat, di Dines Kaséhatan Kota Sukabumi.

Dina biantarana Walikota Sukabumi nandeskeun, dina danget ieu mahabu kasus panyalahgunaan obat jeung panggunasalahan obat. Anapon istilah panyalahgunaan obat nya éta nempo kana kaayaan, dimana obat digunakan sacara kaleuleuwihi tanpa tujuan médis atawa indikasi tinangtu. Sedengkeun istilah panggunasalahan obat, nya éta nempo kana panggunaan obat anu teu tepat, lantaran panggunana teu apal kana cara ngagunakeun obat anu bener.

Salajuna dijelaskeun, kasus panyalahgunaan obat anu anyar sarta jadi perhatian nasional, nya éta panyalahgunaan tablét PCC (Paracétamol, Carisoprodol jeung Caféin), di Kendari Sulawesi Tenggara. Ngan parandéné kitu, pikeun obat Paracétamol, boh panyadiaan tunggal boh kombinasi jeung Caféin, danget ieu masih diijinan pikeun digunakeun térapi.

Sedengkeun pikeun Carisoprodol anu ngarupakeun bahan baku obat anu méré éfék kana rélaksasi otot jeung éfék samping sedatif jeung euphoria, dina dosis anu leuwih luhur tina dosis térapi bisa nyababkeun kejang jeung halusinasi, sarta éfék samping séjéna anu ngabahayakeun kaséhatan jeung bisa ngaakibatkeun tilar dunya. Tah ku sabab kitu, sakabéh obat anu ngandung zat aktif Carisoprodol, ijin pangédaranana geus dicabut ku BPOM (Badan Pangawas Obat jeung Makanan), cindekna ti taun 2013 nu geus kalarung.

Salian ti éta ogé dijelaskeun, saupama di masyarakat masih kénéh aya obat anu ngandung zat aktif Carisoprodol, bisa dipastikeun éta obat téh ilégal jeung teu layak konsumsi. Anapon usaha pikeun nyegah parédaran tablét PCC di Kota Sukabumi, dina tanggal 16 Séptémber 2017, geus dilaksanakeun Oprasi Babarengan antara Polres Sukabumi Kota jeung Dines Kaséhatan Kota Sukabumi, ka satiap sarana distribusi obat di Kota Sukabumi, nya éta ka satiap apoték jeung toko obat, sarta hasilna teu manggihan aya tablét PCC. Ěta oprasi téh diteruskeun ku nyebarkeun walapatra panglarang sakaligus ngabina satiap sarana distribusi obat di Kota Sukabumi, hususna nu aya kaitanana jeung tablét PCC katut obat-obat tinangtu anu remen disalahgunakeun, cindekna tanggal 20 Séptémber 2017 nu anyar kaliwat.