KOTA SUKABUMI GEUS DIAJÉN KU TIM VÉRIFIKASI KOTA SÉHAT TINGKAT NASIONAL TAUN 2017

Reporter : ENDANG SUMARDI

Kota Sukabumi geus diajén ku Tim Vérifikasi Kota Séhat Tingkat Nasional Taun 2017. Sedengkeun kadatangan éta Tim Vérifikasi Kota Séhat téh, dibagéakeun sakaligus ditarima sacara resmi ku Walikota Sukabumi, H. Mohamad Muraz, S.H., M.M., di Rohangan Utama Balé Kota Sukabumi. Hadir dina kasempetan éta, unsur Forkopimda (Forum Komunikasi Pimpinan Daérah) Kota Sukabumi, Wakil Ketua TP PKK Kota Sukabumi, Sekertaris Daérah Kota Sukabumi, Dr. H.M.N. Hanafie Zain, M.Si., Asistén Paékonomian jeung Pangwangunan Setda Kota Sukabumi, H. Dédén Soléhudin, S.Ag., M.M., para Kapala OPD (Organisasi Parangkat Daérah) nu aya kaitanana, Ketua Forum Kota Séhat Sukabumi, Drs. H. Sulaéman Muchtar, S.H., M.M. katut réngrénganana, sarta para tamu ondangan lianna.

Dina kasempetan éta, Walikota Sukabumi ngajelaskeun, Kota Sukabumi geus 2 kali terus-terusan meunang layang pangajén Kota Séhat Lével III, nya éta Swasti Saba Wistara Tingkat Nasional, sarta ngajukeun 6 tatanan, cindekna dina taun 2015 jeung taun 2016. Ěta layang pangajén téh ngarupakeun layang pangajén pang luhurna, anu dipasrahkeun ku Pamaréntah Puseur ka Kota Séhat di Indonésia.

Salajuna dijelaskeun, aya 8 indikator poko anu hasil dicumponan ku Kota Makassar Propinsi Sulsel (Sulawesi Selatan), anu pamustunganana dibéré status jeung prédikat Kota Séhat ku Pamaréntah Puseur. Anapon ka 8 éta indikator poko téh, nya éta Wajib Diajar 9 Taun, Angka Melék Huruf anu ngaronjat, Pendapatan Perkapita Doméstik anu undak, Angka Kamatian Bayi per 1000 kalahiran hirup anu turun, Angka Kamatian Balita per 1000 kalahiran hirup anu turun, Angka Kamatian Ibu Ngalahirkeun per 100.000 kalahiran hirup anu turun, Ayana RTRW (Rencana Tata Ruang Wilayah), sarta Program Dana Séhat jeung Jaminan Sosial Nasional pikeun masarakat miskin.

Lian ti éta, Walikota Sukabumi ogé ngajelaskeun, ku geus ayana RTRW téh, dina pangajénan Kota Séhat Taun 2017 ieu, Kota Sukabumi ngajukeun 7 tatanan, sarta diharepkeun bisa mertahankeun prédikat Kota Séhat Lével III, nya éta Swasti Saba Wistara Tingkat Nasional. Disagigireun ti éta ogé dijelaskeun, Pamaréntah Kota Sukabumi katut OPD jeung Lembaga nu aya kaitanana, salawasna usaha satékah polah ngaronjatkeun rupa-rupa tatanan jeung kawasan kota séhat, anu ngawengku kawasan pamukiman, sarana jeung prasarana umum, kawasan sarana lalu lintas anu tartib jeung palayanan transportasi, kawasan industri jeung pakantoran anu séhat, kawasan pariwisata anu séhat, kahirupan warga masarakat anu séhat jeung mandiri, katahanan pangan jeung gizi, sarta kahirupan sosial anu séhat.