WALIKOTA SUKABUMI NITÉNAN PANGWANGUNAN PASAR TRADISIONAL SEMI MODÉREN KOTA SUKABUMI

Reporter : ENDANG SUMARDI

Walikota Sukabumi, H. Mohamad Muraz, S.H., M.M., niténan pangwangunan tahap awal pamasangan tihang pancang Pasar Tradisional Semi Modéren Kota Sukabumi, cindekna di tempat urut Pasar Pelita Kota Sukabumi, anu digarap ku PT FAP (Fortunindo Artha Perkasa). Dina kasempetan éta Walikota Sukabumi ngajelaskeun, Pamaréntah Kota Sukabumi nargétkeun prosés pangwangunan Pasar Tradisional Semi Modéren Kota Sukabumi téh, bisa réngsé dina jangka waktu sataun satengah. Tah kukituna, Walikota Sukabumi neda doa jeung pangrojong ka sakumna lapisan warga masarakat katut ka para padagang éks Pasar Pelita Kota Sukabumi, supaya prosés pangwangunan Pasar Tradisional Semi Modéren Kota Sukabumi téh bisa lumangsung kalayan hadé jeung lancar, luyu jeung targét waktu anu geus ditetepkeun.

Salian ti éta, sakumna lapisan warga masarakat katut para padagang éks Pasar Pelita Kota Sukabumi, sangkan ilubiung ngawal kana prosés pangwangunan Pasar Tradisional Semi Modéren Kota Sukabumi. Salajuna dijelaskeun, ayana Puseur Padagangan Pasar Tradisional Semi Modéren Kota Sukabumi téh kacida strategisna, sarta baris jadi pangdongkrak jeung panggerak paékonomian warga masarakat Kota Sukabumi. Disagigioreun ti éta ogé dijelaskeun, prosés tahap awal pangwangunan Pasar Tradisional Semi Modéren Kota Sukabumi téh, geus dilaksanakeun sababaraha waktu ka tukang, nya éta pamasangan tihang pancang di sajumlah titik, sarta diperkirakeun baris réngsé dina jero waktu kurang leuwih 25 poé.

Leuwih jauh Walikota Sukabumi ngajelaskeun, diwanguna Pasar Tradisional Semi Modéren Kota Sukabumi téh, sabagé sala sahiji usaha Pamaréntah Kota Sukabumi, pikeun ngaronjatkeun kaamanan jeung katartiban, boh pikeun para padagang boh pikeun warga masarakat anu balanja ka éta pasar, sakaligus ngalaksanakeun panataan Puseur Kota Sukabumi ka nu leuwih hadé deui, sarta leuwih aman, tartib jeung asri. Lantaran sakumna PKL (Padagang Kaki Lima) anu jualan di trotoar jeung bahu jalan di sabudeureun urut Pasar Pelita Kota Sukabumi téh, baris ditampung di Pasar Tradisional Semi Modéren Kota Sukabumi.

Lian ti éta ogé dijelaskeun, salila 4 taun ngajabat Kapala Daérah babarengan jeung Wakil Walikota Sukabumi, H. Achmad Fahmi, S.Ag., M.M.Pd., pihakna geus usaha satékah polah mawa Kota Sukabumi ka nu leuwih hadé dina sagala widang, sarta rupa-rupa jangji pulitik nu ditepikeun dina mangsa kampanyeu calonkeun Walikota jeung Wakil Walikota Sukabumi 4 taun ka tukang, geus diwujudkeun sacara hadé jeung lancar, ngaliwatan 7 skala prioritas pangwangunan Kota Sukabumi. Anapon ka 7 skala prioritas pangwangunan Kota Sukabumi téh, nya éta nu aya kaitanana jeung aspék sosial budaya, réformasi birokrasi, pamiaraan jeung pangwangunan infrastruktur lingkungan hirup, sarta aspék atikan, kaséhatan, ékonomi jeung pananggulangan kamiskinan, kaasup aspék bébas waragad palayanan dasar.