WALIKOTA SUKABUMI KATUT WALIKOTA BANDUNG NÉKEN MOU JEUNG PAJANGJIAN GAWÉ BARENG

Reporter : ENDANG SUMARDI

Walikota Sukabumi, H. Mohamad Muraz, S.H., M.M. katut Walikota Bandung, H. Mochamad Ridwan Kamil, S.T., M.U.D., néken MoU (Mémorandum of Understanding) atawa nota kasapahaman jeung pajangjian gawé bareng, dina raraga ngalaksankeun Aplikasi Smart City jeung é-Government, cindekna tanggal 1 Novémber 2017, di Pendopo Kota Bandung. Anapon para pangagung anu milu marengan Walikota Sukabumi dina néken éta MoU jeung pajangjian gawé bareng téh, nya éta Sekertaris Daérah Kota Sukabumi, Dr. H.M.N. Hanafie Zain, M.Si., Inspéktur Kota Sukabumi, Rudi Juhayat, S.H., Kapala Diskominfo (Dines Komunikasi jeung Informatika) Kota Sukabumi, Drs. Gabril Sukarman, M.Pd., Kapala Bagian Hukum Setda Kota Sukabumi, Ěén Rukmini, S.H., M.H., Kapala Bagian Ortala (Organisasi jeung Tata Laksana) Setda Kota Sukabumi, Diar Ruswidjanarko, ATD., M.Ěng.M., sarta Kapala Bagian Paékonomian, Pangwangunan jeung Kerjasama Daérah Setda Kota Sukabumi, Rahmat Sukandar, S.Si., M.T., M.Sc.

Saréngséna néken MoU jeung pajangjian gawé bareng, Walikota Sukabumi ngajelaskeun, Pamaréntah Kota Sukabumi geus siap nuju 100 Smart City jeung é-Government. Sabab sakumna SKPD (Satuan Kerja Parangkat Daérah) di lingkungan Pamaréntah Kota Sukabumi geus ngabogaan aplikasi sorangan, sarta dina danget ieu keur diintegrasikeun dina hiji sistim. Maksud jeung tujuanana, supaya sakumna lapisan warga masarakat bisa leuwih gampang ngaaksés rupa-rupa béwara anu dibutuhkeun. Salian ti éta, Walikota Sukabumi katut sakumna unsur pingpinan di lingkungan Pamaréntah Kota Sukabumi, baris salawasna usaha satékah polah ngarojong sakaligus ngawujudkeun jeung ngalaksanakeun Smart City jeung é-Government di Kota Sukabumi, luyu jeung cepetna sarta mekarna téknologi informasi danget ieu.

Sedengkeun usaha pikeun ngawujudkeun Smart City jeung é-Government di Kota Sukabumi, salian ti ngamangpaatkeun infrastruktur jeung suprastruktur nu dipibanda danget ieu, Pamaréntah Kota Sukabumi ogé nguntun gawé bareng jeung pihak sawasta, hususna dina ngalaksanakeun palayanan téknologi informasi, ku cara ngawangun sajumlah titik palayanan internét haratis pikeun warga masarakat di rohang-rohang publik, saperti di Taman Urang Lapangan Merdéka, Taman Cikondang, Setda Kota Sukabumi, Dispusip (Dinws Perpustakaan Umum jeung Kaarsipan) Kota Sukabumi, sarta dina waktu deukeut baris disadiakeun di aréa Terminal Tipeu A. K.H. Ahmad Sanusi Kota Sukabumi. Disagigireun nguntun gawé bareng jeung pihak sawasta, Pamaréntah Kota Sukabumi ogé ngamangpaatkeun poténsi Paguron Luhur nu aya di Kota Sukabumi, saperti Politéknik Sukabumi jeung UMMI (Universitas Muhammadiyah Sukabumi), pikeun ngaronjatkeun poténsi nu aya di Kota Sukabumi, sarta pikeun ngagampangkeun jeung ngaronjatkeun palayanan publik, ku cara ngamangpaatkeun téknologi informasi.