WALIKOTA SUKABUMI MEUNANG LAYANG PANGAJÉN PANG LUHURNA TI PERSIDÉN RI

Reporter : ENDANG SUMARDI

Walikota Sukabumi, H. Mohamad Muraz, S.H., M.M., meunang layang pangajén pang luhurna ti Persidén RI, nya éta Anugrah Tanda Kahormatan Satyalancana Karya Bhakti Praja Nugraha Taun 2017. Ěta layang pangajén téh, diseumatkeun sacara langsung ku Mendagri (Mentri Dalem Negri) RI, Tjahjo Kumolo, dina ranggeuyan Upacara Pangéling-ngéling Poé Pahlawan Taun 2017, cindekna poé Jumaah, 10 Novémber 2017, pukul 08.00 WIB, di Kantor Kemendagri (Kementrian Dalem Negri) Jakarta, babarengan jeung para Bupati katut Walikota séjénna sa Indonésia nu meunang éta layang pangajén.

Saréngséna narima éta layang pangajén, Walikota Sukabumi ngajelaskeun, Layang Pangajén Anugrah Tanda Kahormatan Satyalancana Karya Bhakti Praja Nugraha téh, ngarupakeun layang pangajén pang luhurna ti Persidén RI, hususna dina ngalaksanakeun jeung ngaronjatkeun pangalolaan manajemen pamaréntahan. Ěta layang pangajén téh didasarkeun kana pangajénan kinerja pang hadéna sa Indonésia, hasil EKPPD (Ěvaluasi Kinerja Panyalagaraan Pamaréntahan Daérah) kana LPPD (Laporan Pananggungjawaban Panyalagaraan Pamaréntahan Daérah) Taun 2015, anu dilaksanakeun ku Kemendagri RI kalayan dibantu ku sajumlah lembaga saperti BPKP (Badan Pangawas Kauangan jeung Pangwangunan). Anapon para Bupati katut Walikota anu meunang éta layang pangajén téh, nya éta Bupati Banyuwangi, Bupati Karang Anyar, Bupati Pati, Bupati Probolinggo, Bupati Kuningan, Walikota Bandung, Walikota Banjar, Walikota Gorontalo, Walikota Makasar, Walikota Sukabumi jeung Walikota Bontang.

Ku meunangna éta layang pangajén téh, Walikota Sukabumi ngucapkeun rasa sukur jeung reueus. Sabab meunangna éta layang pangajén téh dibarengan ku ngaronjatna kinerja Pamaréntah Kota Sukabumi, hususna dina ngalaksanakeun jeung ngaronjatkeun pangalolaan manajemen pamaréntahan. Lian ti éta Walikota Sukabumi ngajelaskeun, meunangna éta layang pangajén téh, ngarupakeun hasil gawé anu rancagé ti sakumna réngréngan birokrasi di lingkungan Pamaréntah Kota Sukabumi.

Salajuna dijelaskeun, meunangna éta layang pangajén téh, didasarkeun kana pangajénan taun 2016 kana LPPD taun 2015, anu wajib ditepikeun ka Pamaréntah Puseur tiap taun pikeun dijadikeun bahan jeung évaluasi, utamana dina usaha ngalaksanakeun jeung ngaronjatkeun pangalolaan manajemen pamaréntahan di satiap kabupatén jeung kota di Indonésia. Sabab LPPD ieu téh ngarupakeun instrumén pikeun Pamaréntah Puseur, dina ngalaksanakeun pangajénan palaksanaan Otda (Otonomi Daerah) di satiap daérah propinsi sarta kabupatén jeung kota di Indonésia.