WALIKOTA SUKABUMI MEUNANG KAPERCAYAAN DEUI NEPIKEUN ÉSKSPOSE DI TINGKAT NASIONAL

Reporter : ENDANG SUMARDI

Walikota Sukabumi, H. Mohamad Muraz, S.H., M.M., meunang kapercayaan deui nepikeun éskspose di tingkat nasional, ngeunaan program Quick Win Kota Sukabumi, nya éta Dana Panguatan UMKM (Usaha Mikro Kecil jeung Menengah), dina acara Seminar jeung Malem Pang-anugrahan Gerakan Nuju 100 Smart City Taun 2017, cindekna tanggal 15 Novémber 2017, di Hotél Santika Hayam Wuruk Jakarta. Ěta kagiatan téh dibuka sacara resmi ku Mentri Komunikasi jeung Informatika RI, Rudiantara, S.Stat., MBA., sarta diiluan ku 24 Kota jeung Kabupatén sa Indonésia, anu kapilih dina tahap munggaran Gerakan Nuju 100 Smart City, jeung geus hasil nyusun Smart City Masterplan.

Walikota Sukabumi ngajelaskeun, dina Smart City Masterplan téh aya sababaraha program anu ngamangpaatkeun téknologi, pikeun ngajawab tangtangan sakaligus harepan jeung kasempetan ti masing-masing daérah nepi ka 10 taun ka hareup. Sedengkeun Gerakan Nuju 100 Smart City, ngarupakeun program babarengan Kamentrian Komunikasi jeung lnformatika, Kamentrian Dalem Negri, Kamentrian PUPR,  Bappenas jeung Kantor Staf Kapersidénan, anu maksud jeung tujuanana nya éta pikeun ngabingbing Pamaréntahan Kota jeung Kabupatén, dina nyusun Smart City Masterplan, sarta diharepkeun Pamaréntah Kota jeung Kabupatén bisa Ieuwih onjoy dina ngamangpaatkeun téknologi, boh dina ngaronjatkeun palayanan ka masarakat boh dina ngagali jeung ngahangkeutkeun poténsi nu aya di masing-masing daérahna.

Salajuna dijelaskeun, pikeun milih 24 Kota jeung Kabupatén dina tahap munggaran Gerakan Nuju 100 Smart City téh, Pamaréntah Puseur ngabogaan sababaraha katangtuan, saperti KKD (Kamampuhan Kauangan Daérah), Daftar Kota jeung Kabupatén anu ngabogaan kinerja luhur, lndéks Kota anu terus-terusan jeung Indéks Kota Héjo. Disagigireun ti éta, Pamaréntah Puseur ogé ngasupkeun paktor Diménsi Pangwangunan Séktor Unggulan, Diménsi Pangwangunan Pamarataan jeung Kawilayahan sarta Nawa Cita, sangkan ieu program téh bisa dilaksanakeun di satiap daérah di Indonésia.

Lian ti éta ogé dijelaskeun, dina nyieun Smart City Masterplan téh, Pamaréntah Daérah dibantu ku praktisi jeung akademisi ti rupa-rupa institusi, saperti Universitas Indonésia, Institute Téknologi Bandung, BPPT Universitas Multimédia Nusantara jeung CitiAsia, sarta ngalibetkeun inohong masarakat jeung komunitas di masing-masing daérahna. Sedengkeun di sisi téknologi, ngalibetkeun lndosat Ooredoo Business, sabagé Téchnology Advisor anu ngabantu kana usaha ngahangkeutkeun jeung ngagancangkeun palaksanaan téknologi Smart City.

Saterusna Walikota Sukabumi ngajelaskan, ku ayana kolaborasi ti sakumna pihak téh, diharepkeun bisa ngabentuk ékosistem anu aktip, pikeun ngawujudkeun sakumna rarancang nu aya dina Smart City Masterplan. Disagigireun nyieun Smart City Masterplan, Gerakan Nuju 100 Smart City ogé ngawajibkeun satiap daérah pikeun nyieun program anu bisa sagancangna dirasakeun ku masarakat atawa Quick Win, sarta diharepkeun bisa méré gambaran ka masarakat ngeunaan épektipitas program Smart City, anu ahirna masarakat bisa kadorong pikeun ngabantu Pamaréntah Daérah dina ngawujudkeun Smart City Masterplan anu geus disusun. Salajuna dijelaskeun, ieu kagiatan téh baris ditutup ku acara pamasrahan layang pangajén ka 24 Pamingpin Kota jeung Kabupatén anu geus némbongkeun komitmen pikeun ngarojong kana ngawujudna Gerakan Nuju 100 Smart City.

Leuwih jauh Walikota Sukabumi ngajelaskeun, program Quick Win Kota Sukabumi, diantarana program Dana Bagulir pikeun UMKM, nya éta Pamaréntah Kota Sukabumi méré subsidi injeuman anu dibikeun ku BPR (Bank Perkreditan Rakyat) Kota Sukabumi, ka para palaku UMKM. Saterusna dijelaskeun. Pamaréntah Kota Sukabumi geus ngabogaan daptar UMKM binaan, anu satuluyna diajukeun ka BPR Kota Sukabumi pikeun meunang injeuman anu bunga leutik. Anapon prosés panangtuan gedé injeumanana, dilaksanakeun sapinuhna ku pihak BPR Kota Sukabumi, tanpa campur leungeun Pamaréntah Kota Sukabumi. Sedengkeun perséntaseu panyaluyuan ti pihak BPR Kota Sukabumi kana daptar UMKM anu diajukeun ku Pamaréntah Kota Sukabumi téh, ngahontal angka leuwih ti 90 peresén.

 

Salian ti éta ogé dijelaskeun, kaunggulan tina Quick Win téh, nya BMT (Baitul Maal wa Tamwil) jeung BPR jadi maju. Kitu deui UMKM di Kota Sukabumi bisa leuwih ngaronjat jeung mekar, sarta ajén SDM (Sumber Daya Manusa) di Kota Sukabumi jadi leuwih hadé deui. Tah lantaran kitu, Walikota Sukabumi ngaharepkeun, ku ieu ékspose téh bisa méré mangpaat ka daérah séjénna.