SAKUMNA ASN DINA PANYALAGARAAN PILKADA BARENG TAUN 2018 KUDU SALAWASANA NÉTRAL

Reporter : ENDANG SUMARDI

Walikota Sukabumi, H. Mohamad Muraz, S.H., M.M. nandeskeun, sakumna ASN (Aparatur Sipil Nagara) di lingkungan Pamaréntah Kota Sukabumi, dina mapag jeung panyalagaraan Pilkada (Pamilihan Kapala Daérah) Bareng Taun 2018, nya éta Pilkada Gubernur katut Wakil Gubernur Jawa Barat sarta Walikota katut Wakil Walikota Sukabumi, kudu salawasana nétral. Tapi disisi lain, ASN ogé ngabogaan hak pilih dina nangtukeun Pasangan Calon Kapala Daérah ka hareup, anu ahirna réa warga masarakat anu nganggap, yén ASN ngarojong sala sahiji Pasangan Calon Kapala Daérah.

Tah kuayana éta hal téh, lain hartina ASN teu nétral, tapi dina mangsa ASN nyalurkeun hak pilihna, pasti baris milih-milih Pasangan Calon Kapala Daérah anu mana anu baris dipilihna. Tah kulantaran kitu, ulah nganggap ASN ngarojong atawa ngameunangkeun sala sahiji Pasangan Calon Kapala Daérah, lantaran ASN ogé ngabogaan hak pilih, sarta ulah nganggap ASN teu nétral jeung jadi panrojong sala sahiji Pasangan Calon Kapala Daérah.

Tapi éta hal téh gumantung ka pribadi ASN-na. Komo deui ASN di daérah, Pasangan Kapala Daérah anu dipilihna téh baris digawé babarengan ngawangun daérahna. Tah kulantaran kitu, kacondongan ASN milih ka sala sahiji Pasangan Calon Kapala Daérah téh pasti aya sarta moal bisa dikélah, sabab ASN ogé ngabogaan hak pilih. Anu jelas, sakumna ASN teu meunang ilubiung pikeun ngarahkeun, ngadalikeun jeung ngampanyeukeun sala sahiji Pasangan Calon Kapala Daérah ka warga masarakat. Tah kukituna, saupama aya ASN anu maén pulitik praktis baris ditindak tegas jeung ditibanan sangsi anu beurat, nya éta bisa dionslah malah bisa dipidana.

Salian ti éta, ASN ogé kudu bisa nempatkeun diri jeung posisina dina mangsa di lapangan, jeung teu meunang ngerahkeun massa. Tapi saupama ngan saukur hayang ngareungeukeun kampanyeu sala sahiji Pasangan Calon Kapala Daérah mah moal nanaon jeung moal jadi masalah, asal dina poé peré digawé, jeung éta ogé sipatna ngan saukur pikeun konsumsi pribadi. Ngan dina poé digawé mah teu meunang, kecuali ASN anu mancén gawé di lapangan, saperti Dines Pahubungan, Satpol PP jeung Kesbangpol.

Ěta panandesan Walikota Sukabumi téh, ditepikeun dina biantara, basa muka sacara resmi Sosialisasai Pilkada Bareng Taun 2018 pikeun ASN di lingkungan Pamaréntah Kota Sukabumi, cindekna tanggal 22 Nopémber 2017, di hotél Anugrah Kota Sukabumi.