P2RW PAMARÉNTAH KOTA SUKABUMI TAUN 2017 GEUS RÉNGSÉ 100 PERESÉN

Reporter : ENDANG SUMARDI

Asistén Pamaréntahan Setda Kota Sukabumi, Drs. H. Andri Setiawan, M.M. nandeskeun, P2RW (Program Pemberdayaan Rukun Warga) Pamaréntah Kota Sukabumi Taun 2017 anu diwaragadan tina APBD (Anggaran Pendapatan jeung Balanja Daérah) Kota Sukabumi Taun 2017 nya éta gedéna Rp. 6,23 miliar, atawa masing-masing RW gedéna Rp. 17 juta, geus réngsé 100 peresén. Malah geus ngahontal 70 peresén Pangurus RW anu sumebar di 33 kalurahan jeung 7 kacamatan sa Kota Sukabumi, geus masrahkeun Laporan Pananggungjawabanana.

Tah kukituna, Asistén Pamaréntahan Setda Kota Sukabumi, meredih ka Pangurus RW anu can masrahkeun Laporan Pananggungjawaban P2RW Taun 2017, sangkan sagancangna masrahkeun Laporan Pananggungjawabanana, telatna dina ahir bulan Désémber 2017 ieu. Tah ku éta hal téh, Laporan Pananggungjawaban P2RW Taun 2017, dina ahir bulan Désémber 2017 ieu geus dipasrahkeun ku sakumna Pangurus RW sa Kota Sukabumi.

Salajuna dijelaskeun, Laporan Pananggungjawaban P2RW  ieu téh, baris dipariksa ku Tim Monitoring P2RW Kota Sukabumi, anu anggotana ti sajumlah SKPD (Satuan Kerja Parangkat Daérah), diantarana Bagian Tata Pamaréntahan Setda Kota Sukabumi// Saterusna éta Tim téh baris ngalaksanakeun monitoring jeung évaluasi sacara langsung ka lapangan, pikeun ngukur jeung mastikeun katepatan Laporan Pananggungjawaban P2RW anu dipasrahkeun ku satiap Pangurus RW.

Asistén Pamaréntahan Setda Kota Sukabumi ngajelaskeun, pihakna ngarasa yakin, yén satiap Pangurus RW bisa ngagunakeun waragad P2RW, luyu jeung koridor anu geus ditetepkeun. Lantaran satiap Pangurus RW geus paham jeung parigel dina ngalaksanakeun panyusunan Proposal P2RW, kaasup prosés dina nyairkeun waragad jeung ngagawéan pangwangunanana, nepi ka nyusun Laporan Panangungjawabanana.

Lian ti éta ogé dijelaskeun, ti mimiti digulirkeunana P2RW di Kota Sukabumi, tingkat ilubiung warga masarakat dina pangwangunan di satiap RW di Kota Sukabumi, salawasna ngarandapan paningkatan anu lain lumayan. Anapun hasil monitoring jeung évaluasi P2RW Taun 2016, tingkat ilubiung warga masarakat dina pangwangunan di satiap RW di Kota Sukabumi, rata-rata ngahontal 50 peresén.

Leuwih jauh Asistén Pamaréntahan Setda Kota Sukabumi ngajelaskeun, P2RW anu digagas ku Walikota Sukabumi, H. Mohamad Muraz, S.H., M.M. katut Wakil Walikota Sukabumi, H. Achmad Fahmi, S.Ag., M.M.Pd. ieu téh, meunang perhatian ti sajumlah daérah Kota jeung Kabupatén, anu ahirna réa Kota jeung Kabupatén anu ngadongdon Kota Sukabumi, pikeun ngalaksanakeun study banding jeung niténan sacara langsung kana hasil-hasil pangwangunan di satiap RW di Kota Sukabumi ngaliawatan éta program.