BPBD KOTA SUKABUMI GEUS NGABENTUK TRC-PB

Reporter : ENDANG SUMARDI

BPBD (Badan Pananggulangan Bencana Daérah) Kota Sukabumi, geus ngabentuk TRC-PB (Tim Réaksi Cepet Pananggulangan Bencana), cindekna dina Diseminasi PKDR (Panguatan Kasiapsiagaan Daérah Rawan) Bencana Hidrométéorologi, anu lumangsung tanggal 5 Désémber 2017, di Grand Yustik Selabintana Sukabumi. Sedengkeun Anggota éta TRC-PB téh, sakumaha anu dijelaskeun ku Kapala Unsur Palaksana BPBD Kota Sukabumi, Drs. Asép Suhéndrawan, ngalibetkeun sajumlah unsur OPD (Organisasi Parangkat Daérah) sarta instansi jeung lembaga téhnis nu aya kaitannana, saperti Dines Pahubungan, Satpol PP (Satuan Polisi Pamong Praja), DPU-PRP-KPP (Dines Pekerjaan Umum, Panataan Rohang, Paimahan, Kawasan Pamukiman jeung Patanahan), Dines Kaséhatan jeung nu séjénna. Saterusna dijelaskeun, kawijakan éta téh sajalan jeung Undang-Undang Nomer Taun 2007 ngeunaan Pananggulangan Bencana, nya éta usaha dina ngalaksanakeun pananggulangan bencana téh ngarupakeun tugas jeung tanggungjawab sakumna pihak. Tah kulantaran kitu, Logo Pananggulangan Bencana téh disimbulkan Segi Tilu Bulao, sabagé lambang pamaréntah, swasta jeung masarakat.

Anapon maksud jeung tujuan dibentukna éta TRC-PB téh, nya éta pikeun ngagancangkeun pananganan bencana di daérah Kota Sukabumi. Salian ti éta, ogé ngalaksanakeun Perda (Peraturan Daérah) Kota Sukabumi Nomer 7 Taun 2017 ngeunaan Panyalagaraan Pananggulangan Bencana. Salajuna dijelaskeun, ayana TRC-PB téh kacida pentingna. Sabab Kota Sukabumi asup kana KRB (Kawasan Rawan Bencana) di Jawa Barat. Lantaran nurutkeun IRB (Indéks Rawan Bencana) Propinsi Jawa Barat Taun 2011, Kota Sukabumi asup kana Kelas Rawan Bencana Luhur anu skorna 60, sarta aya di urutan ka 19 tina 27 Kabupatén jeung Kota sa Jawa Barat. Sedengkeun dumasar kana hasil Indéks Resiko Bencana Indonésia Taun 2013 anu dikaluarkeun ku BNPB (Badan Nasional Pananggulangan Bencana), Kota Sukabumi asup kana Kelas Resiko Sedeng anu skorna 114. Disagigireun ti éta ogé dijelaskeun, Kota Sukabumi ngabogaan resiko luhur bencana lini, urug, kagaringan jeung kahuruan pamukiman.

Sedengkeun Kapala Séksi Kadaruratan BPBD Propinsi Jawa Barat, Budiman, SKM. nandeskeun, pananggungalan bencana teh lain ukur tugas jeung tanggungjawab BPBD wungkul, tapi tugas jeung tanggungjawab sakumna pihak, nya éta sakumna OPD sarta instansi jeung lembaga téhnis nu aya kaitannana, ka asup swasta jeung masarakat. Disagigireun ti éta ogé ditandeskeun, Gubernur Jawa Barat geus netepkeun Siaga Darurat Bencana Caah jeung Taneuh Urug, nya éta ti mimiti tanggal 1 Nopémber 2017 nepi ka tanggal 31 Méi 2018 nu bakal datang. Saterusna ditandeskeun, panetepan éta Siaga Darurat Bencana téh ngandung harti, yén sakumna OPD pamaréntah, swasta jeung masarakat kudu salawasna siap siaga nyanghareupan kamungkinan ayana kajadian bencana, di daérahna masing-masing.