Ě-KTP PALSU RÉA KAPANGGIH DI RSUD AL-MULK KOTA SUKABUMI

Reporter : ENDANG SUMARDI

Ě-KTP (Kartuh Tanda Padumuk Ělékronik) Palsu, réa kapanggih di RSUD AL-Mulk Kota Sukabumi. Hal éta téh ditepikeun ku Kapala Disdukcapil (Dines Kapadumukan jeung Panyatetan Sipil) Kota Sukabumi, Iskandar, S.IP., M.T., di hareupeun para pamilon Rapat Ěvaluasi Cakupan Kapamilikan Akte Kalahiran pikeun warga masarakat umur 0 nepi ka 18 taun, anu diiluan ku para Ketua RW sa Kota Sukabumi, cindekna tanggal 5 Désémber 2017, di Gedong Juang 45 Kota Sukabumi.

Salajuna dijelaskeun, Disdukcapil Kota Sukabumi hasil ngadetéksi Ě-KTP Palsu di RSUD AL-Mulk Kota Sukabumi, ngaliwatan Program CĚTĚK (Cukup Ě-KTP jeung Kartu Kulawarga) keur warga masarakat Kota Sukabumi, pikeun meunang palayanan kaséhatan haratis di RSUD AL-Mulk Kota Sukabumi. Sabab Oprator ABK (Alat Baca Kartuh) di RSUD AL-Mulk Kota Sukabumi, hasil ngalacak Ě-KTP Palsu, sanggeus kanyahoan éta Ě-KTP téh chip-na teu bisa dibaca. Lian ti éta ogé dijelaskeun, éta Ě-KTP téh saliwat taya bédana jeung Ě-KTP Asli. Ngan sanggeus di baca ku patugas ngaliwatan ABK, éta Ě-KTP téh palsu, sabab taya chipan. Meureun pamalsu éta Ě-KTP téh, hayang ngamangpaatkeun palayanan kaséhatan haratis di RSUD AL-Mulk Kota Sukabumi, ngaliwatan Program CĚTĚK. Tah kulantaran kitu, sakumna pasén anu katohian mawa Ě-KTP Palsu ka RSUD AL-Mulk Kota Sukabumi, diwajibkeun kudu mayar sakabéh waragad pangobatan kaséhatan, sabab dianggap teu ngabogaan Ě-KTP, sakumaha anu disaratkeun ku Pamaréntah Kota Sukabumi jeung RSUD AL-Mulk Kota Sukabumi.

Saterusna dijelaskeun, nepi ka danget ieu, ABK kakara aya di Disdukcapil Kota Sukabumi jeung RSUD AL-Mulk Kota Sukabumi. Anapon kaunggulan tina alat éta téh, nya éta bisa maluruh kaaslian Ě-KTP ku cara maca chipna, anu ditémpél dina éta dokumén kapadumukan. Tah kukituna, dina taun hareup Disdukcapil Kota Sukabumi baris masang éta ABK, di satiap Kantor Kacamatan sa Kota Sukabumi.

Leuwih jauh dijelaskeun, Disdukcapil Kota Sukabumi baris usaha satékah polah nyegah ayana Ě-KTP Palsu, diantarana ku cara nguntun gawé bareng jeung Satpol PP (Satuan Polisi Pamong Praja) Kota Sukabumi, pikeun ngalaksanakeun Oprasi Yustisi. Disagigireun ti éta, Kapala Disdukcapil Kota Sukabumi meredih ka para Ketua RW jeung RT sa Kota Sukabumi, sangkan ngabantu Disdukcapil Kota Sukabumi, hususna dina ngungkulan éta masalah, sakaligus ngabantu ngahangkeutkeun kapamilikan dokumén kapadumukan warga masarakat, di lingkunganana masing-masing. Maksud jeung tujuanana, supaya sakumna warga masarakat Kota Sukabumi ngabogaan dokumén kapadumukan. Ulah nepi ka aya warga masarakat Kota Sukabumi anu teu mampuh katarajang gering teu ngabogaan KTP jeung KK, anu pamustunganana teu bisa dilayanan di RSUD AL-Mulk Kota Sukabumi.