KALUNGGUHAN KAPOLRES SUKABUMI KOTA GEUS DISÉRÉN-SUMÉRÉNKEUN

Reporter : ENDANG SUMARDI

Kalungguhan Kapolres Sukabumi Kota geus disérén-sumérénkeun. ti Kapolres Sukabumi Kota heubeul, AKBP Rustam Mansur, S.IK., ka Kapolres Sukabumi Kota anyar, AKBP Susatyo Purnomo Condro, S.H., S.I.K., M.Si. Lantaran Kapolres Sukabumi Kota heubeul dipromosikeun nyangking kalungguhan Wakil Diréktorat Kriminal Husus Polda Jabar. Sedengkeun Kapolres Sukabumi Kota anyar, saméméhnya nyangking kalungguhan sabagé Analisis Kawijakan Muda Widang Kajian Strategis SOPS Polri. Anapon acara paturay tineung jeung ngabagéakeun Kapolres Sukabumi Kota heubeul katut Kapolres Sukabumi Kota anyar téh, dicalagarakeun di Sundarasa Sukabumi, cindekna tanggal 7 Désémber 2017, nu anyar kaliwat.

Hadir dina kasempetan éta, Walikota Sukabumi, H. Mohamad Muraz, S.H., M.M., Wakil Walikota Sukabumi, H. Achmad Fahmi, S.Ag., M.M.Pd., Wakil Bupati Sukabumi, Drs. H. Adjo Sardjono, M.M., Ketua TP PKK Kota Sukabumi, Hj. Ěsih Setiasih Muraz, S.Ě., Wakil Ketua TP PKK Kota Sukabumi, Hj. Fitri Hayati Fahmi, S.Ag., M.M.Pd., Pingpinan katut Anggota DPRD Kota Sukabumi, Unsur FKPD (Forum Komunikasi Pingpinan Daérah) Kota Sukabumi, para Asistén Daérah Setda Kota Sukabumi, para Kapala OPD (Organisasi Parangkat Daérah), para Camat jeung Lurah, para Danramil jeung Kapolsek, para alim ulama, inohong masarakat jeung pamuda, sarta para tamu ondangan lianna.

Walikota Sukabumi, H. Mohamad Muraz, S.H., M.M., dina biantarana kalayan asmana pribadi katut Kapala Daérah sarta pamaréntah jeung warga masarakat Kota Sukabumi, ngahaturkeun nuhun katut pangajén anu saluhur-luhurna, ka Kapolres Sukabumi Kota heubeul, anu geus nguntun gawé bareng sacara hadé, antara Polres Sukabumi Kota jeung Pamaréntah Kota Sukabumi sarta instansi jeung lembaga nu aya kaitannana, hususna dina mayungan jeung méré pangamanan ka warga masarakat Kota Sukabumi jeung sabudeureunnana.

Sedengkeun ka Kapolres Sukabumi Kota anyar, Walikota Sukabumi ngawilujengkeun sumping katut ngawilujengkeun mancén gawé, sakaligus ngaharepkeun, sangkan gawé bareng antara Polres Sukabumi Kota jeung Pamaréntah Kota Sukabumi katut instansi jeung lembaga nu aya kaitannana anu geus diuntun sacara hadé ku Kapolres Sukabumi Kota heubeul, supaya ditindak-laju sarta dironjatkeun ku Kapolres Sukabumi Kota anyar, hususna dina mayungan jeung méré pangamanan ka warga masarakat Kota Sukabumi jeung sabudeureunnana.

Salajuna Kapolres Sukabumi Kota heubeul, AKBP Rustam Mansur, S.IK., dina kasempetan éta neda dihampura sakaligus ngahaturkeun nuhun ka Pamaréntah Kota Sukabumi jeung Pamaréntah Kabupatén Sukabumi katut Kodim 0607 Kota Sukabumi, hususna ka sakumna réngréngan Polres Sukabumi Kota, anu geus ngarojong jeung ngabantu kana palaksanaan pancén gawé salila 19 bulan jadi Kapolres Sukabumi Kota. Lian ti éta ogé ngaharepkeun ka Pamaréntah Kota Sukabumi jeung Pamaréntah Kabupatén Sukabumi katut Kodim 0607 Kota Sukabumi, hususna ka sakumna réngréngan Polres Sukabumi Kota, sangkan salawasna ngarojong jeung ngabantu kana pancén gawé Kapolres Sukabumi Kota anyar.

Saterusna Kapolres Sukabumi Kota anyar, AKBP Susatyo Purnomo Condro, S.H., S.I.K., M.Si., ngaharepkeun ka Pamaréntah Kota Sukabumi jeung Pamaréntah Kabupatén Sukabumi katut Kodim 0607 Kota Sukabumi, hususna ka sakumna réngréngan Polres Sukabumi Kota, sangkan salawasna ngarojong jeung ngabantu, malah mandar sakumna pagawéan anu jadi pancén Kapolres Sukabumi Kota bisa dilaksanakeun sacara hadé jeung lumangsung lungsur-langsar, luyu jeung anu diharepkeun ku sakumna pihak.