POLRES SUKABUMI KOTA NALINGAKEUN UNDAKNA HARGA SABABARAHA KOMODITAS DI KOTA SUKABUMI

Reporter : ENDANG SUMARDI

Polres Sukabumi Kota ngerahkeun Satgas (Satuan Tugas) Pangan, nalingakeun jeung niténan undakna harga sababaraha komoditas di Pasar Tradisional di Kota Sukabumi, hususna jalur distribusi komoditas nu asup kana Sembako (Sembilan Bahan Poko). Panalingaan jeung paniténan éta téh dipingpin langsung ku Kapolres Sukabumi Kota, AKBP Susatyo Purnomo Condro, S.H., S.I.K., M.Si., nya éta ku cara mapay satiap kios, utamana kios padagang komoditas sayuran jeung daging.

Kapolres Sukabumi Kota ngajelaskeun, panalingaan jeung paniténan ieu téh ngalibetkeun unsur Diskop UKM-PP (Dines Koprasi, Usaha Kecil Menengah, Padagangan jeung Paindustrian) Kota Sukabumi, DKP3 (Dines Katahanan Pangan, Patanian jeung Paikanan) Kota Sukabumi, Perum Bulog (Perusahaan Umum Badan Urusan Logistik) jeung intansi nu aya kaitannana séjénna. Saterusna dijelaskeun, panalingaan jeung paniténan ieu téh dipuseurkeun kana jalur distribusi Sembako jeung bahan strategis séjénna, nya éta jalur kaluar-asupna baris ditalingakeun jeung dititénan sacara ketat ku Satgas Pangan Polres Sukabumi Kota. Lantaran di titik éta gampang pisan jeung remen ngabalukarkeun kana kajadian undakna harga.

Lian ti éta ogé dijelaskeun, dilaksanakeunnana panalingaan jeung paniténan kana undakna harga sababaraha komoditas di Pasar Tradisional di Kota Sukabumi ieu téh, luyu jeung paréntah Kapolri, anu gawé bareng jeung Kamentrian Padagangan, Kamentrian Patanian jeung stake holder liana, sarta arahan ti Kapolda Jabar, sangkan ngalaksanakeun panalingaan jeung paniténan kana harga-harga kabutuhan poko warga masarakat, utamana dina mangsa mapag poé-poé gedé jeung dina ahir taun.

Leuwih jauh Kapolres Sukabumi Kota ngajelaskeun, sakabéh prosés distribusi barang ti mimiti tingkat pamasok jeung tahap panyimpenan nepi ka ngadistribusikeun ka para padagang, baris ditalingakeun jeung dititénan sacara ketat ku Satgas Pangan Polres Sukabumi Kota. Tah kuayana éta hal téh, saupama aya kajadian undakna harga anu sipatna ngadadak jeung ajénna luhur, Satgas Pangan Polres Sukabumi Kota baris langsung ngalaksanakeun panyalidikan, pikeun muka lalangsé nu jadi panyabab kana kajadian undakna harga.

Sedengkeun Kapala Diskop UKM-PP Kota Sukabumi, Drs. Ayép Supriatna, M.M. ngajelaskeun, undakna harga sababaraha komoditas strategis di Pasar Tradisional di Kota Sukabumi sababara poé ieu téh masih dina kaayaan normal, lantaran undakna masih dina wates kawajaran. Anapon sababaraha komoditas strategis anu ngarandapan undak di Pasar Tradisional di Kota Sukabumi téh, diantarana sababaraha komoditas sayuran. Nya éta Cabé Beureum TW ngarandapan undak Rp. 8 rébu. tina harga saméméhna Rp. 36 rébu jadi 44 rébu rupia sakilo, jeung Cabé Rawit Beureum ngarandapan undak Rp. 4 rébu, tina harga saméméhna Rp. 20 rébu jadi Rp. 24 rébu sakilo.

Salajuna dijelaskeun, kajadian undakna harga sababaraha komoditas strategis hususna komoditas sayuran di Pasar Tradisional di Kota Sukabumi téh, diantarana diakibatkeun ku kaayaan cuaca, nya éta inténsitas hujan anu luhur jeung angin kenceng di sababaraha daérah, sarta ngabalukarkeun jeung mangaruhan anu kurang hadé kana séktor patanian, diantarana nya éta kana turunna pasokan éta komoditas ka Kota Sukabumi, sarta ngabalukarkeun kana undakna harga éta komoditas.