TI MIMITI TAUN 2018 PAMARÉNTAH KOTA SUKABUMI BARIS MUPUS RÉTRIBUSI ANGKOT

Reporter : ENSANG SUMARDI

Sakumaha anu dijelaskeun ku Kapala Dines Pahubungan Kota Sukabumi, Abdul Rachman, A.TD., ti mimiti Taun 2018, Pamaréntah Kota Sukabumi nurutkeun rarancang baris mupus Rétribusi Angkot (Angkutan Kota). Ěta rarancang téh, ogé pernah ditepikeun ku Walikota Sukabumi, H. Mohamad Muraz, S.H., M.M. sawatara bulan ka tukang, yén Pamaréntah Kota Sukabumi geus ngararancang baris mupus Rétribusi Angkot. Salian ti éta, Pamaréntah Kota Sukabumi ogé geus ngararancang baris mupus Rétribusi Trayék Panguji jeung Trayék Terminal. Tah kuayana éta hal téh, satiap Angkot teu mayar deui éta rétribusi. Maksud jeung tujuannana, nya éta pikeun ngahampangkeun Angkot, sakaligus pikeun mupus katimburuan sosial antara Angkot jeung Angkutan Online.

Salajuna dijelaskeun, dipupusna éta rétribusi téh, sabagé subsidi ti Pamaréntah Kota Sukabumi pikeun Angkot, supaya ngabogaan daya saéng jeung angkutan umum séjénna. Disagigireun ti éta, ogé ngarupakeun sala sahiji perhatian jeung kapadulian Pamaréntah Kota Sukabumi, pikeun ngahampangkeun para supir Angkot, supaya bisa ngaronjatkeun palayanan ka para panumpang.

Nigeung jumlah Angkot anu oprasi di Kota Sukabumi dina danget ieu, nurutkeun Kapala Dines Pahubungan Kota Sukabumi, anu kadata di Dines Pahubungan Kota Sukabumi, sagemblengna aya 2.162 unit. Ngan anu manjangan trayékna dina Taun 2017, ukur 1.400 unit. Sedengkeun pangasilan tina Rétribusi Angkot di Kota Sukabumi téh, dina saban taunna rata-rata ngahontal Rp. 1 miliar.

Kapala Dines Pahubungan Kota Sukabumi ogé ngajelaskeun, ku ayana éta subsidi téh, para supir Angkot baris museur méré palayanan ka para panumpang tanpa kudu mikiran mayar rétribusi. Lian ti éta, ogé moal aya deui Angkot anu telat manjangan trayékna. Saterusna dijelaskeun, pikeun ngawujudkeun éta rarancang téh, pihak Dines Pahubungan Kota Sukabumi, keur nunggu kaputusan ti Pamaréntah Kota Sukabumi jeung OPD (Organisasi Parangkat Daérah) sarta instansi nu aya kaitannana. Tah kulantaran kitu, pihak Dines Pahubungan Kota Sukabumi, salawasna usaha satékah polah ngabahas éta rarancang jeung Pamaréntah Kota Sukabumi katut OPD sarta instansi nu aya kaitannana, sangkan éta rarancang téh bisa diwujudkeun dina Taun 2018.

Sedengkeun sajumlah supir Angkot, basa dikolongan ayana éta rarancang téh, nyarita ngarasa gumbira sarta ngahaturkeun nuhun ka Pamaréntah Kota Sukabumi jeung Dines Pahubungan Kota Sukabumi, katut ka OPD jeung instansi nu aya kaitannana, sakaligus ngaharepkeun, sangkan éta rarancang téh bisa diwujudkeun dina Taun 2018. Lantaran ku dipupusna Rétribusi Angkot sarta Rétribusi Trayék Panguji jeung Trayék Terminal téh, bisa ngahampangkeun para pangusaha jeung supir Angkot.