GROUNDBREAKING PANGWANGUNAN DOUBLE TRACK KARÉTA API BOGOR-SUKABUMI GEUS DILAKSANAKEUN

Reporter : ENDANG SUMARDI

Groundbreaking atawa pananeman batu munggaran proyék pangwangunan double track atawa jalur ganda Karéta Api Bogor-Sukabumi geus dilaksanakeun, cindekna tanggal 15 Désémber 2017, di Cicurug Sukabumi, Jawa Barat, sarta ditangaraan ku neken tombol sirineu ku Persidén RI, Ir. H. Joko Widodo, Menhub (Mentri Pahubungan) RI, Budi Karya Sumadi, Gubernur Jawa Barat, Dr. H. Ahmad Héryawan, Lc., M.Si., Walikota Sukabumi, H. Mohamad Muraz, S.H., M.M., katut Bupati Sukabumi, Drs. H. Marwan Hamami, M.M.

Hadir dina kasempetan éta, Panglima TNI, Marsekal Hadi Tjahjanto, Mentri PUPR (Pekerjaan Umum jeung Perumahan Rakyat) RI, Ir. Mochamad Basoeki Hadimoeljono, M.Sc., Ph.D., Kapala Staf Kapersidénan RI, Tétén Masduki, Unsur FKPD (Forum Komunikasi Pingpinan Daérah) Propinsi Jawa Barat jeung Wilayah 1 Propinsi Jawa Barat, sarta para tamu ondangan liana.

Dina kasempetan éta, Persidén RI, Ir. H. Joko Widodo nandeskeun, pihakna geus nginstruksikeun ka sakumna réngréngannana, pikeun sagancangna ngalaksanakeun pangwangunan sajumlah sarana transportasi nuju Sukabumi, nya éta pangwangunan Jalan Tol Bocimi (Bogor-Ciawi-Sukabumi) jeung pangwangunan double track Karéta Api Bogor-Sukabumi. Sateruna ditandeskeun, pangwangunan double track Karéta Api Bogor-Sukabumi téh, ditargétkan réngsé dina taun 2020 nu bakal datang, kalayan dina ngagawéannana diharepkeun sangkan ngagunakeun pola padat karya, sarta leuwih mentingkeun jeung merhatikeun muka lapangan gawé pikeun warga masarakat, hususna nu aya di sabudeureun éta proyék pangwangunan double track karéta api.

Sedengkeun Menhub RI, Budi Karya Sumadi ngajelaskeun, dina tahap munggaran pangwangunan double track Karéta Api Bogor-Sukabumi ieu téh, baris diwangun sapanjang 7 kilo meter, nya éta ti Cicurug nepi ka Cigombong. Anapon pasualan anu disanghareupan dina éta pangwangunan double track karéta api téh, nya éta jalur rél anu nanjak jeung pungkal-péngkol. Tah kulantaran kitu, jalur rél éta karéta api téh baris dijieun tanjakan jeung péngkolannana jadi leuwih datar, nya éta ku cara nurunkeun luhurna taneuh leuwih ti 10 méter. Salian ti éta, Menhub RI ogé baris ngatur jumlah stasiun anu bakal diliwatan dina éta jalur rél double track karéta api, nya éta stasiun mana waé anu kudu ditambah jeung stasiun mana waé anu kudu dikurangan. Sabab saupama loba teuing eureun, pajalanan karéta apina baris lila.

Salajuna Walikota Sukabumi, H. Mohamad Muraz, S.H., M.M., ngucapkeun rasa sukur sakaligus ngahaturkeun nuhun ka sakumna pihak hususna ka Peresidén RI, Ir. H. Joko Widodo, anu geus ngawujudkeun dua pameredih tina tilu pamaredih kahayang warga masarakat Kota Sukabumi jeung sabudeureunnana, nya éta pangwangunan Jalan Tol Bocimi jeung pangwangunan double track Karéta Api Bogor-Sukabumi, anu groundbreaking proyék pangwangunannana geus dilaksanakeun. Sedengkeun pameredih anu katilu, nya éta pangwangunan Bandara Sukabumi, anu tahapan pangwangunannana baris sagancangna dilaksanakan, sarta dijadwalkeun réngsé dina taun 2020 nu bakal datang. Tapi pikeun tempatna masih kénéh dirahasiahkeun, ngan anu geus pasti tempatna aya di wewengkon Sukabumi.