DINES PAHUBUNGAN KOTA SUKABUMI SIAP NGABANTU PAMINDAHAN STASION KARÉTA API SUKABUMI

Reporter : ENDANG SUMARDI

Dines Pahubungan Kota Sukabumi, siap ngabantu pamindahan Stasion Karéta Api Sukabumi. ti puseur dayeuh Kota Sukabumi ka wewengkon pasisian Kota Sukabumi, nya éta ka wewengkon Selakaso, Kalurahan Babakan, Kacamatan Cibeureum, Kota Sukabumi, nya éta ka wewengkon deukeut tapel wates wewengkon Kota Sukabumi jeung wewengkon Kabupatén Sukabumi. Lantaran pamindahan Stasion Karéta Api Sukabumi ka wewengkon pasisian Kota Sukabumi téh, nurutkeun Kapala Dines Pahubungan Kota Sukabumi, Abdul Rachman, A.TD., bisa ngarojong kana sistim transportasi di Kota Sukabumi, luyu jeung kamekaran infrastruktur pahubungan Kota Sukabumi pikeun sababaraha taun ka hareup. Salian ti éta, ogé luyu jeung pangwangunan infrastruktur pahubungan sacara gedé-gedéan nuju Kota Sukabumi, anu dilaksanakeun ku Pamaréntah Puseur. Tah kuayana éta hal téh, aksésbilitas transportasi di Kota Sukabumi, ka hareup baris leuwih gampang dijugjug ti sagala jurusan.

Saterusna dijelaskeun, kuayana pangwangunan éta infrastruktur téh, ngabutuhkeun panyaluyuan sistim transportasi di Kota Sukabumi, sarta Dines Pahubungan Kota Sukabumi siap pikeun ngabantuna. Lian ti éta ogé dijelaskan, rarancang pamindahan Stasion Karéta Api Sukabumi ka wewengkon Selakaso téh, baris dipadukeun jeung terminal barang sarta terminal panumpang. Anapon nu jadi bahan tinimbangan pamindahan Stasion Karéta Api Sukabumi ka wewengkon Selakaso téh, nya éta bisa ngaronjatkeun aksésbilitas transportasi jeung kandaraan nu asup ka jero dayeuh Kota Sukabumi/ Tah kulantaran kitu, ayana Stasion Karéta Api Sukabumi di puseur dayeuh Kota Sukabumi sabagé puseur panampungan panumpang anu rék ninggalkeun jeung nuju Kota Sukabumi téh, teu mungkin bisa dipertahankeun.

Disagigireun ti éta ogé dijelaskeun, ngeunaan rarancang pamindahan Stasion Karéta Api Sukabumi ti puseur dayeuh Kota Sukabumi ka wewengkon Selakaso téh, muncul dina pasamoan saliwat, antara Dines Pahubungan Kota Sukabumi jeung Mentri Pahubungan RI sawatara waktu ka tukang. Anapon acara poko dina éta pasamoan téh, nya éta ngabahas kamekaran katut kasiapan Pamaréntah Puseur jeung Pamaréntah Kota Sukabumi, kana pangwangunan Jalan Tol Bocimi (Bogor-Ciawi-Sukabumi) jeung pangwangunan double track atawa jalur ganda Karéta Api Bogor-Sukabumi sarta pangwangunan Bandara Sukabumi, anu ditargétkeun kudu réngsé dina taun 2019 jeung 2020 nu bakal datang. Sedengkeun pangwangunan double track Karéta Api Bogor-Sukabumi, ditargetkeun kudu réngsé dina taun 2019 nu bakal datang, lantaran asup kana Proyék Strategis Nasional. Salajuna usaha pikeun ngawujudkeun rarancang pamindahan Stasion Karéta Api Sukabumi ti puseur dayeuh Kota Sukabumi ka wewengkon Selakaso téh, pihak Dines Pahubungan Kota Sukabumi geus ngusulkeun ka Pamaréntah Puseur ngaliwatan Kamentrian Pahubungan RI, sarta meunang balesan jeung tanggepan anu positif ti Mentri Pahubungan RI, kalayan éta rarancang teh baris sagancangna ditindak-laju.