WALIKOTA SUKABUMI MEREDIH KA PERSIDÉN RI SANGKAN WEWENGKON SUSUKECIR ASUP KA KOTA SUKABUMI

Reporter : ENDANG SUMARDI

Walikota Sukabumi, H. Mohamad Muraz, S.H., M.M., meredih sacara lisan ka Persidén RI, Ir. H. Joko Widodo, sangkan wewengkon Susukecir Kabupatén Sukabumi, anu ngawengku wewengkon Kacamatan Sukalarang, Kacamatan Sukaraja, Kacamatan Kebonpedes jeung Kacamatan Cireunghas, asup ka Kota Sukabumi. Hal éta téh luyu jeung kahayang warga masarakat Susukecir jeung kabutuhan Pamaréntah Kota Sukabumi.

Ěta pameredih téh, ditepikeun ku Walikota Sukabumi, dina kagiatan groundbreaking atawa pananeman batu munggaran proyék pangwangunan double track atawa jalur ganda Karéta Api Bogor-Sukabumi, cindekna tanggal 15 Désémber 2017, di Kampung Bangkongréang, Desa Benda, Kacamatan Cicurug, Kabupatén Sukabumi, disaksian ku Bupati Sukabumi, Drs. H. Marwan Hamami, M.M.

Walikota Sukabumi ogé ngajelaskeun ka Persidén, yén lega wewengkon Kabupatén Sukabumi téh, pang legana sa Jawa jeung Bali, nya éta ngahontal 4.120 kilométer, kalayan jumlah padumukna ngahontal kurang leuwih 2,8 juta jiwa. Sedengkeun lega wewengkon Kota Sukabumi ngan ukur 48,15 kilométer, sarta jumlah padumukna ngahontal 380 rébu jiwa. Salajuna dijelaskeun, Bapa Persidén mairan sacara daria, kana ngagabungna wewengkon Susukecir ka Kota Sukabumi. Nurutkeun Bapa Persidén, saupama éta hal téh hadé, sangkan sagancangna dilaksanakeun.

Nyigeung tanggepan Bupati Sukabumi, Drs. H. Marwan Hamami, M.M., basa masalah éta ditepikeun ka Persidén, nurutkeun Walikota Sukabumi, Bapak Bupati Sukabumi ngan ukur mésem-mésem wungkul. Walikota Sukabumi ngungkabkeun, pajoangan Pamaréntah Kota Sukabumi sangkan wewengkon Susukecir bisa ngagabung ka Kota Sukabumi téh, geus dilaksanakan sababaraha kali. Saterusna diungkabkeun, dina tanggal 9 Juni 2014 nu geus kaliwat, Pamaréntah Kota Sukabumi meredih ka Pamaréntah Kabupatén Sukabumi, sangkan sagancangna mairan surat pameredih ngagabungna wewengkon Susukecir ka Kota Sukabumi.

Salian ti éta ogé diungkabkeun, saméméhna Pamaréntah Kota Sukabumi ngan ukur ngabogaan sikep pasif kana harepan warga masarakat Susukecir anu hayang ngagabung ka Kota Sukabumi téh, lantaran Pamaréntah Kota Sukabumi kudu ngajungjung luhur darajat jeung étika pamaréntahan. Sabab éta prosés téh kudu ditempuh ngaliwatan mékanismeu aturan jeung undang-undang anu ditetepkeun.

Ngan kuayana desekan ti warga masarakat Susukecir anu keukeuh hayang ngagabung ka Kota Sukabumi, sarta ditarimana surat ti Mentri Dalem Negri RI Nomer 138.4/275/PUM tanggal 7 Maret 2007 jeung surat ti Gubernur Jawa Barat Nomer 138/1597/Desen tanggal 4 Méi 2007, anu eusina maréntahkeun Bupati Sukabumi jeung Walikota Sukabumi sangkan ngalaksanakeun kajian jeung koordinasi, ahirna Pamaréntah Kota Sukabumi nepikeun surat pameredih ka Pamaréntah Kabupatén Sukabumi, sangkan wewengkon Susukecir asup ka Kota Sukabumi. Disagigireun ti éta ogé dijelaskeun, eusi éta surat téh lain ngan saukur kahayang ngalegaan wewengkon Kota Sukabumi wungkul, tapi ogé harepan warga masarakat Susukecir, anu hayang ngagabung ka Kota Sukabumi.