RARANCANG PAMINDAHAN STASION KARÉTA API SUKABUMI KA WEWENGKON SELAKASO KEUR DIKAJI KU KEMENHUB

Reporter : ENDANG SUMARDI

Sakumaha anu diungkabkeun ku Kapala Dines Pahubungan Kota Sukabumi, Abdul Rachman, A.TD., rarancang pamindahan Stasion Karéta Api Sukabumi ti wewengkon Kalurahan Gunungparang, Kacamatan Cikolé, Kota Sukabumi ka wewengkon Selakaso, Kalurahan Babakan, Kacamatan Cibeureum, Kota Sukabumi, danget ieu keur dikaji ku Kemenhub (Kementrian Pahubungan), diantarana nu aya kaitannana jeung gedéna waragad pikeun ngabiayaan sakabéh prosés pamindahan ka éta wewengkon.

Salajuna diungkabkeun, ngabahas ngeunaan rarancang pamindahan Stasion Karéta Api Sukabumi téh, muncul dina pasamoan saliwat, antara Dines Pahubungan Kota Sukabumi jeung Mentri Pahubungan sawatara waktu kaliwat. Anapon acara poko dina éta pasamoan téh, nya éta ngabahas kamekaran jeung kasiapan Pamaréntah Puseur jeung Pamaréntah Kota Sukabumi, kana pangwangunan Jalan Tol Bocimi (Bogor-Ciawi-Sukabumi) jeung pangwangunan double track atawa jalur ganda Karéta Api Bogor-Sukabumi sarta pangwangunan Bandara Sukabumi, anu ditargétkeun kudu réngsé dina taun 2019 jeung 2020 nu bakal datang. Sedengkeun pangwangunan double track Karéta Api Bogor-Sukabumi, ditargétkeun kudu réngsé dina taun 2019 nu bakal datang, lantaran asup kana Proyék Strategis Nasional.

Sedengkeun nu jadi bahan tinimbangan pamindahan Stasion Karéta Api Sukabumi ka wewengkon Selakaso téh, sabab wewengkonnna masih ngabogaan lahan anu cukup lega sarta nyumponan jeung strategis, lantaran ngabogaan aksés jalan anu hadé pisan jeung gampang dijugjug, sabab deukeut ka Jalan Lingkar Selatan jeung peta Jalan Tol Bocimi, anu dina danget ieu keur diwangun. Ngan ngeunaan kasiapan jeung nu séjénna kana rarancang pamindahan Stasion Karéta Api Sukabumi téh can dilaksanakeun, lantaran keur dikaji kénéh ku Kemenhub.

Saterusna dijelaskeun, Dines Pahubungan Kota Sukabumi teu ngabogaan kawenangan pikeun ngawujudkeun pamindahan éta Stasion Karéta Api. Sabab Dines Pahubungan Kota Sukabumi ngan ukur sawates ngusulkeun ka Kemenhub, supaya oprasional Karéta Api bisa leuwih hadé deui, utamana dina nyumponan kabutuhan transportasi warga masarakat. Tah kulantaran kitu, Dines Pahubungan Kota Sukabumi ngan ukur bisa nungguan kaputusan leuwih laju ti Kemenhub.

Lian ti éta ogé dijelaskeun, saupama geus aya kaputusan ti Kemenhub jeung nyaluyuan kana rarancang pamindahan éta Stasion Karéta Api, baris sagancangna diwujudkeun. Disagigireun ti éta ogé dijelaskeun, rarancang ngeunaan pamindahan Stasion Karéta Api Sukabumi téh, meunang tanggapan positif ti Kemenhub. Buktina dina danget ieu keur dikaji ku Kemenhub, hususna nu aya kaitannana jeung gedéna waragad pikeun nagabiayaan sakabéh prosés pamindahan Stasion Karéta Api Sukabumi ka éta wewengkon.