LURAH CITAMIANG KACAMATAN CITAMIANG KOTA SUKABUMI PARANTOS MULIH KA JATI MULANG KA ROHMATULLOH

Reporter : ENDANG SUMARDI

Innalillahi wainnailaihi rojiun, parantos mulih ka jati mulang ka Rohmatulloh, Lurah Citamiang, Kacamatan Citamiang, Kota Sukabumi, Yédi Mogalana, S.IP., dina dinten Saptu, ping 30 Désémber 2017, sakira pukul 01.30 WIB, di RSHS (Rumah Sakit Hasan Sadikin) Bandung, alatan teu damang, sarta parantos dikurebkeun dina dinten Saptu siangna, di Taman Rohmat, Kalurahan Citamiang, Kacamatan Citamiang, Kota Sukabumi. Anapon anu jadi Inspéktur Upacara, nya éta Wakil Walikota Sukabumi, H. Achmad Fahmi, S.Ag., M.M.Pd.

Sedengkeun saméméhna, ogé parantos tilar dunya Kapala Séksi KIP (Kerjasama jeung Informasi Palayanan) Disdukcapil (Dines Kapadumukan jeung Panyatetan Sipil) Kota Sukabumi, Dédi Sunardi, S.IP., cindekna dina dinten Salasa, ping 26 Désémber 2017, sakira pukul 16.15 WIB, d Rumah Sakit Bétha Médika Sukabumi, ogé alatan teu damang.

Ku parantos ngantunkeunana kadua éta pajabat téh, sakumna pagawé jeung warga masarakat Kota Sukabumi, ngarasa sedih jeung kaleungitan. Teu rék kitu kumaha, atuda saréréa ogé ngarasa asa diheulang.

Wakil Walikota Sukabumi, H. Achmad Fahmi, S.Ag., M.M.Pd., kalayan asmana pribadi katut kulawarga sarta Kapala Daérah katut Pamaréntah Kota Sukabumi, ngiring béla sungkawa sakaligus ngadoa, sangkan arwah almarhum kadua éta pajabat téh kéngéng rohmat sareng maghfiroh, ditampi iman islamna, sarta ditempatkeun di tempat anu nimat, anu dipikarido ku Nu Maha Kawasa, Alloh Aza Wa Zalla. Kitu deui sadaya kulawarga anu dikantunkeunana, sing salawasna dipaparinan kakuatan, kasobaran katut katabahan, dina nampi takdir ti Illahi Robbi ieu. Amin !