WALIKOTA SUKABUMI NGAWILUJENGKEUN MANCÉN GAWÉ DINA TAHUN 2018

Reporter : ENDANG SUMARDI

Walikota Sukabumi, H. Mohamad Muraz, S.H., M.M., ngawilujengkeun mancén gawé dina tahun 2018, ka sakumna pagawé di lingkungan Pamaréntah Kota Sukabumi. Lian ti éta, Walikota Sukabumi ogé ngahaturkeun nuhun katut pangajén anu saluhur-luhurna ka sakumna pagawé di lingkungan Pamaréntah Kota Sukabumi, anu geus usaha satékah polah ngalaksanakeun pancén gawé sacara hadé dina sapanjang taun 2017.

Ěta pangwilujeng katut hatur nuhun Walikota Sukabumi téh, ditepikeun basa jadi Pembina Apél Isuk Pagawé di lingkungan Setda Kota Sukabumi, kassup Diskominfo (Dines Komunikasi jeung Informatika) Kota Sukabumi, Dispusip (Dines Perpustakaan jeung Kaarsipan) Kota Sukabumi, sarta BPKD (Badan Pangalolaan Kauangan Daérah) Kota Sukabumi, dina poé munggaran asup gawé taun 2018, cindekna tanggal 2 Januari 2018, di Buruan Apél Setda Kota Sukabumi.

Hadir dina kasempetan éta, Wakil Walikota Sukabumi, H. Achmad Fahmi, S.Ag., M.M.Pd., PLT (Palaksana Tugas) Sekertaris Daérah Kota Sukabumi, Drs. H. Saléh Makbullah, M.Si., para Asistén Daérah Setda Kota Sukabumi, para Kapala Bagian di lingkungan Setda Kota Sukabumi, Kapala Diskominfo Kota Sukabumi, Kapala Dispusip Kota Sukabumi, sarta Kapala BPKD Kota Sukabumi.

Disagigireun ti éta, Wakil Walikota Sukabumi ogé ngaharepkeun ka sakumna pagawé di lingkungan Pamaréntah Kota Sukabumi, sangkan gantina taun ti taun 2017 ka taun 2018 téh, dijadikeun paradigma hijrah jeung ajang introspéksi diri, nya éta ti nu kurang hadé jadi hadé, jeung ti nu hadé jadi leuwih hadé dina rupa-rupa kahirupan, boh dina kahirupan masarakat boh dina karidupan bangsa jeung nagara.

Anu teu éléh penting, sakumna pagawé di lingkungan Pamaréntah Kota Sukabumi, sangkan salawasna usaha satékah polah jeung ngalaksanakeun pancén gawé sacara hadé dina sapanjang taun 2018, dibarengan ku dédikasi, loyalitas jeung disiplin anu luhur, hususna dina méré jeung ngaronjatkeun palayanan ka sakumna lapisan warga masarakat Kota Sukabumi dina rupa-rupa widang, didadasaran ku kaimanan jeung katakwaan sarta ahlakul karimah atawa ahlak anu hadé. Salian ti éta, sakumna pagawé di lingkungan Pamaréntah Kota Sukabumi, ogé sangkan salawasna usaha satékah polah  mertahankeun sakaligus ngaronjatkeun rupa-rupa prestasi anu geus dicangking ku Kota Sukabumi, boh di Tingkat Propinsi Jawa Barat boh di Tingkat Nasional.